اسلام آباد۔ 16 مارچ (اے پی پی) وزیرخارجہ مخدوم شاہ محمود قریشی پارینے کہ اپوزیشن نا کنڈآن نمبرآتا بابت کروک آ دعویٰ راستکی تیان مبنی اف۔ چارشنبے نادے آ ملکی سیاسی حالیت آتا بابت اسہ بیان اسے ٹی وزیرخارجہ پارے کہ اگہ اپوزیشن نا دعویٰ حقی مسکہ تو اودے داخہ تگ و دود کننگ نا ضرورت پیش بتوکہ۔ شاہ محمود قریشی پارے کہ ننا سیوتی تون مسہ نیم سال انا تعلق و رابطہ ءِ، نن ملک ءِ جوڑ کننگ کن اسیجائی کوشست آتیٹی اوار مسونن۔ سیوتی تتون ننا رابطہ غاتیٹی اسہ چرجوئی اسے وخت اس کہ اپوزیشن اوفتا کسر اٹ اڑاند کرسا بسنے، ہراتم خلیج زیات ودا تو زور ہم زیات خلوئی تمک۔ اوپارے کہ اینو اگہ نون لیگ، ق لیگ ءِ آفرز تننگ ءِ تو انت ق لیگ انا سنگت آک تپسہ کہ 2018 نا الیکشن تیٹی او ق لیگ نا کسر اٹ اخس اڑاند تالان کریر؟ انت ایم کیو ایم نامخلوق تپسہ کہ پیپلزپارٹی سندھا ٹی اوفتے تون انت سلوک کرے؟ پیپلزپارٹی نا کنڈآن اتوک آ بلدیاتی کانود نا برخلاف او سراپا برانزئسر و نن اوفتے تون ہمکلام ئسن انت ہمو سلوک اوفتے یات بفک؟ انت او تپسہ کہ پیپلزپارٹی تدوک آ پانزدہ سال انا اقتدار اٹی حیدر آباد و کراچی ٹی اوفتا ووٹر آتون انت سلوک کرے؟ شاہ محمود قریشی پارے کہ وقتی اوڑدہی تا بنداو آ حالیت آتا سہی جاچ ءِ کننگ مفک۔ ہراتم نن حالیت آتا تسلسل نا زاویہ اٹ ہرنہ تو است جم مریک۔
