اسلام آباد۔ 16 مارچ (اے پی پی) وزیر خارجہ مخدوم شاہ محمو د قریشی اسلاموفوبیا تون مون تننگ نا جہانی دے انا بابت چارشنبے نادے آ تینا اسہ بیان اسے ٹی پارے کہ خارتس بیانیہ ءِ لغام خلنگے۔ وزیرخارجہ پارے کہ اینو ای مچ آ قوم ءِ مبارکبادی ایتیوہ۔ وزیراعظم عمرا ن خان اقوام متحدہ ٹی کروک آ تقریر اٹی اسلاموفوبیا نا ودوک آ کچ انا برخلاف جہد نا بناءِ کرے۔ وزیراعظم نا پارت آ ای دا باندات ءِ نیامے ٹی اڈ ہلوک آ او آئی سی وزراء خارجہ کونسل نا 47 می دیوان اٹ ہرفیٹ۔ نیامے ٹی مروک آ دیوان اٹی ڈغار آوار مس و نن امہ ءِ داویل آ اسٹ کرین و اسلاموفوبیا نا ودوک آ کچ انا برخلاف امنائی قرارداد منظور مس، اوکان پد پاکستان اقوام متحدہ ٹی قرارداد پیش کرے۔ وزیرخارجہ پارے کہ نن پارین کہ نبی آخرالزمان حضرت محمد صلی اللہ علیہ و آلہ وسلم نا شان اٹی گستاخی نا چرجوئی بند مرے۔ خارتس بیانیہ ءِ لغام خلنگے۔ الحمداللہ دنیا ننا موقف ءِ امنا کرینے و ننا سلاہ غا دا فیصلہ مسنے کہ ہر سال پانزدہ مارچ انا دے آ اسلاموفوبیا نا توننگ نا جہانی دے انا وڑاٹ اڈتننگک۔ اللہ تعالیٰ نا فضل و کرم اٹ پاکستان ءِ اسلاموفوبیا نا برخلاف اسہ بھلو سرسہبی اس دوئی مسنے۔ ای دا سرسہبی آ مچ آ قوم ءِ مبارکبادی ایتیوہ۔
