اسلام آباد۔ 16 مارچ (اے پی پی) صدر مملکت ڈاکٹر عارف علوی پارینے کہ آخبت نا جہانی نظام اخلاقیات ، انصاف و انسانی ہمدردی آ بایدے مبنی مرے، ساڑی آ ورلڈ آرڈر اٹی دولت و واک ءِ اہمیت دوئی ءِ وخت اس کہ انسانیت نا گرج اخلاقی قدر ءِ ، کاروبار تیٹی ہم داپلو آتے مون آ تخنگے۔ داخیال آتا درشانی ءِ او چارشنبے نادے آ ٹیلی نار پاکستان نا کنڈآن ’’اخلاقیات و کاروبار‘‘ نا سرحال آ سیمینار آن تران کرسا کرے۔ ٹیلی نار پاکستان نا چیف ایگزیکٹو آفیسر عرفان وہاب ہم داوخت آ تران کرے۔ صدر مملکت کاروباری بشخ اٹی اخلاقی اصول آتا اہمیت ءِ تالان کرسا پارے کہ کاروبار اٹی منافع تون اوار اوار ورکر آتا حق انا رکھ ، چاگڑدی رداٹ پائیداریت و انسانی ہمدردی و انصاف نا پلو آتے ہم مون آ تخنگے۔ اودنیا ٹی چندی زرگزرانی نظام تا موازنہ ءِ پیش کرسا پارے کہ کاروبار منافع کن ہی کننگک ولے داڑتون اوار اوار ایلو راجی زمواری تیا ہم چکار کننگ نا گرج ءِ، دا بابت بل گیٹس اینڈ ملینڈافاؤنڈیشن نا درور ساڑی ءِ۔ اوپارے کہ بدعنوانی بیرہ مالی مفک بلکن اونا ایلو اخلاقی و راجی جہت ہم ارے ہرافتیا چکار کننگ نا گرج ءِ، جعلی خبر آتیان مروک آ نسخانک ہم ننا مون آٹو۔ صدر مملکت پارے کہ ساڑی دور اٹی ملٹی نیشنل کمپنیک ملکی پالیسی و فیصلہ غاتیا اثرانداز مننگ نا لائخی تخرہ، جہانی باندات آتیٹی فائدہ غاتے اولیت دوئی ءِ وخت اس کہ دنیا نا امن و انسانیت نا آخبت کن اخلاقی اصول آتا بنداو آ فیصلہ کننگ نا اہمیت ءِ، دارداٹ دنیا ءِ اسہ پوسکن ءُ نظام اسے نا گرج ءِ ہرا اخلاقیات و انسانی ہمدردی نا اصول آتیا مبنی مرے۔ داکان مست سی ای او ٹیلی نار عرفان وہاب صدر مملکت ءِ بخیر کرے و پارے کہ ٹیلی نار ءِ پاکستان اٹ تینا کاروبار نا بناءِ کننگ 17 سال پورو مسنے، دارداٹ نن کاروبار اٹ اخلاقیات و شفافیت نا بارواٹ آگاہی ودی کننگ کن سنجیدہ کوشست نا بناءِ کرینن۔ اوپارے کہ شون ہلوک ملک آک اخلاقیات و کارپوریٹ گورننس نا بنداو آ شون ہلکونے، پاکستان اٹی ہم غٹ چنکا بھلا کاروباری ادارہ غاک داڑآ بایدے چکار کیر، کاروبار کن چاگڑد، راج و گورننس ءِ بھلو اہمیت اس دوئی ءِ۔ اوٹیلی نار نا کنڈآن دا بابت کروک آ گام گیج آتے تالان کرسا پارے کہ پاکستان ءِ اونا روا ہند اس ترفنگ کن تینا کوشست آتے برجاتخک۔
