اسلام آباد۔ 16 مارچ (اے پی پی) وزیراعظم عمران خان پارینے کہ ننا حکومت اسلاموفوبیا نا توننگ کن ہرفورم آ تواربڑز کرے، مچ آ مسلم امہ ءِ اسلاموفوبیا نا توننگ نا جہانی دے ءِ اڈتننگ نا سرسہبی آ مبارکبادی ایتیوہ، پی ٹی آئی مدام السی است خواہی تا نمائندگی ءِ کرینے ہرانا سوب آن ہر پڑآ سرسہبی مس، السی مخ تفی نا سوب آن ساڑی سیاسی پڑآ ہم ننے سرسہبی مریک۔ چارشنبے نادے آ وزیراعظم آفس نا میڈیا ونگ آن جاری بیان نا رداٹ قومی اسمبلی نا باسک مخدوم زین حسین قریشی، محمد ابراہیم خان، طاہر اقبال، اورنگزیب خان، ریاض فتیانہ، سردار نصراللہ دریشک، نجیب ہارون ، سردار محمد خان لغاری، عاصمہ قدیر و جویریہ ظفر ئسک وزیراعطم تون اوڑدہی کریر، سندھ آن قومی اسمبلی نا باسک صائمہ ندیم ، سندھ صوبائی اسمبلی نا باسک رابطہ اظفر، جنرل سیکرٹری پی ٹی آئی مبین جتوئی و ارسلان گھمن ئسک ہم اوڑدہی ٹی ساڑی ئسر۔ اوڑدہی تیٹی بنجائی وزیر مخدوم شاہ محمود قریشی، مخدوم خسروبختیار ، سید علی زیدی و خصوصی کمکار ملک عامر ڈوگرئسک ہم ساڑی ئسر۔ پارلیمان نا باسک آک وزیراعظم ءِ اقوام متحدہ ٹی اسلاموفوبیا نا توننگ نا بابت قرارداد منظور مننگ آ مبارکبادی تسر۔ وزیراعظم پارے کہ ننا حکومت اسلاموفوبیا نا توننگ کن ہرفورم آ توار بڑز کرے، ننا کوشست آتیان جہانی سروک آک بشمول روسی صدر پیوٹن و کینیڈا نا وزیراعظم جسٹن ٹروڈوئسک ہم اسلاموفوبیا نا توننگ کن توار بڑز کریر، مچ آ مسلم امہ ءِ دا سرسہبی آ مبارکبادی پیش کیوہ ۔ وزیر اعظم پارے کہ پی ٹی آئی مدام السی است خواہی تا نمائندگی ءِ کرینے ہرانا سوب آن ہر پڑ آ سرسہبی آن ہمکنار مس، السی مخ تفی نا سوب آن ساڑی آ سیاسی پڑآہم سرسہبی مریک۔ اوڑدہی تیٹی تعلقدار حلقہ غاتیٹی شونداری ڈٹ آتیا پیش رفت و سیاسی امور آ سجفنگا۔ وزیرا عظم قومی اسمبلی نا باسک آتے تینا حلقہ غاتیٹی السی رابطہ غاتے ترند کننگ و کارندہ غاتے متحرک کننگ نا پارت ہم کرے۔
