وزیرخارجہ شاہ محمود قریشی نا اقوام متحدہ نا سیکرٹری جنرل وسلامتی کونسل ءِ چٹھی ٹی پاکستان اٹ بھارتی سپر سونک میزائل ءِ بِٹنگ نا واقعہ نا اسیجائی جاست وپاست نا خواست، بھارت نا تینے آن جاست وپاست مسترد

اقوام متحدہ۔ 15 مارچ (اے پی پی) پاکستان نا وزیر خارجہ شاہ محمود قریشی اقوام متحدہ نا سیکرٹری جنرل و سلامتی کونسل نا صدر ءِ نوشتہ کروک آ اسہ چٹھی اسے ٹی بھارت آن 9 مارچ آ پاکستان اٹی بھارتی سپر سونک میزائل ءِ بٹنگ نا واقعہ نا اسیجائی جاست وپاست نا خواست کرینے وبھارت نا کنڈآن داقعہ نا تینے آن جاست وپاست ءِ مسترد کرینے۔ دا چٹھی 2 ایجنڈا نا رداٹ سلامتی کونسل نا غٹ باسک آتے ٹی سرکاری دستاویز نا وڑاٹ اِرا ایجنڈا آئٹم نا وڑاٹ بشخنگا، اولیکو ایجنڈا آئٹم ’’امن و سلامتی ءِ برقرار تخنگ اٹ سلامتی کونسل نا زمواری و ارٹ میکو ایجنڈا آئٹم انڈیا پاکستان کوئسچن ءِ۔ وزیرخارجہ شاہ محمود قریشی اقوام متحدہ نا سلامتی کونسل نا ہندا تُو (مارچ اکن ( صدر و متحدہ عرب امارات نا سفیر لاناز نا نصیبہ و اقوام متحدہ نا سیکرٹری جنرل انتونیو گوتریش ءِ نوشتہ کروک آ چٹھی ٹی بھارت نا کنڈآن پاکستانی فضائی دنگ انا خلاف ورزی آ گڑتی نا درشانی ءِ کرسا خواست کرینے کہ بھارتی کمامدار آتا کنڈآن پیش کروک سادہ وضاحت اتون داوڑنا باندات ءِ ایسر کننگ مفک۔ اوپارے کہ پاکستان تینا فضائی دنگ انا داسخت خلاف ورزی ہرا جہانی ایوی ایشن سیفٹی پروٹوکول نا ہم خلاف ورزی ءِ ، نا ترندی اٹ مذمت ءِ کیک۔ داوڑنا غیر زموارانہ واقعہ غاک بھارت نا ایئر سیفٹی و علاقائی امن و سوگوی نا کنڈآ غیر سنجیدہ رویہ نا ہم ڈیک ءِ۔ پاکستانی وزیر خارجہ پارے کہ میزائل فائر کننگ نا دا واقعہ بھارت نا غیر زموارانہ طرز عمل تون مطابقت تخک ہرانا جہانی برادری و خاص وڑاٹ سلامتی کونسل نا کنڈآن دمدستی نوٹس ءِ ہلنگ نا گرج ءِ۔ اوپارے کہ پاکستانی دنگ اٹ بھارتی میزائل نا تمنگ آن نئے بیرہ شاری تا جائیداد آتے نسخان رسینگانے بلکن مخلوق نا زند ءِ ہم خطرہ ٹی شاغنگانے۔ اوپارے کہ پاکستانی دنگ اٹ میزائل فائر نا واقعہ غان بھلو کچ اسے آ مخلوق نا جانک ہم زیان مننگ کریرہ۔ پاکستانی وزیر خارجہ شاہ محمود قریشی پارے کہ پاکستان و بھارت نا باندات اٹی ہڑتوم آ ملک آتا نیام اٹ بھاز کم فاصلہ و ردعمل نا وخت ءُ پاس انا رداٹ اسہ ایلو نا فوجی کارروائی تا ہرکنڈآن غلط تشریح ڈیہہ و حقیقت اٹ مچ آ دنیا کن سنگین نتیجہ غاتا سوب مننگ کیک۔ اودنیا نا چکار ءِ بھارت نا پدریسہ جارحانہ و غیر زموارانہ گام گیج، اونابھلو کچ اسے آ سلہہ غاتا تیاری اتون اوار اوار اونا جارحانہ فوجی اصول و واک انا انداز نا کنڈآ چکار ءِ کرفے ہرا مدام سویلی ایشیاٹی امن، سلامتی و سوگوی کن ساڑی ءُ خطرہ اسے۔اوبھارت آن خواست کرے کہ او حادثاتی میزائل لانچنگ ءِ توننگ کن کروک آ گام گیج و وڑوڈول نا وضاحت ءِ کے و دا واقعہ نا مخصوص حالیت، پاکستانی دنگ اٹ تموک آ میزائل نا وڑ و خصوصیت و حادثاتی وڑاٹ لانچ کروک آ میزائل نا پرواز نا کسر/ ٹریجیکٹری و دا آخر کار امر مون ءِ ہڑسسا پاکستان اٹ پترینگا، اونا وضاحت ءِ کے۔ نیز داہم کہ دا میزائل اٹ تینے بھس کننگ نا سسٹم ساڑی ئس یا آخا و اگہ ساڑی ئس تو دا بے سہب انت اکن مس و داہم کہ انت بھارتی میزائل ءِ معمول نا خیالداری نا رداٹ ہم لانچ کننگ مریک۔ پاکستانی وزیر خارجہ سوج کرے کہ بھارت حادثاتی وڑاٹ میزائل فائر مننگ نا بابت پاکستان ءِ دمدستی وڑاٹ انت اکن معلومدار کتو و پاکستان نا کنڈآن دا واقعہ نا پیش بننگ نا پڑو و وضاحت ءِ بٹنگ انگ اسکان اونا اعتراف کننگ اٹ انت اکن انتظار کرے۔ نابودی نا کڑب نا کہول ءِ ہرسا، بھارت ءِ دا پیدوار کننگ نا گرج ءِ کہ انت واقعی میزائل ءِ اونا سلہہ بند فوج ہینڈل کریسس یا اوٹی پین اس اوار ئسک؟ پاکستانی وزیر خارجہ شاہ محمود قریشی چٹھی ٹی دا عزم انا ہم درشانی ءِ کرے کہ پاکستان بھارت تون اوار تینا غٹ ہمسایہ ملک آتون پرامن تعلقداری تا خواہندار ءِ۔ اوپارے کہ پاکستان نا امن نا است خواہی، تینا دفاع کن سوگو عزم و لائخی اتون ءِ، ہرادے اقوام متحدہ نا چارٹر نا رداٹ حق انا رداٹ کاریم اٹ اتنگک۔