او آئی سی دیوان اٹی نیام تمنگ کن اِلیپنہ، لانگ مارچ کروک آتے مہالو توتہون نئے آخبت توننگک، وزیر خارجہ شاہ محمود قریشی نا بیان

اسلام آباد۔ 15 مارچ (اے پی پی) وزیر خارجہ شاہ محمود قریشی پارینے کہ او آئی سی دیوان اٹی نیام تمنگ کن اِلیپنہ، لانگ مارچ کروک آتے مہالو تو تہون و نئے آخبت توننگک۔ سے شنبے نادے آ مولانا فضل الرحمان نا لانگ مارچ نا پڑو نا بابت تینا اسہ بیان اسے ٹی وزیر خارجہ پارے کہ او آئی سی کانفرنس اسلام آباد اٹی مننگ والا ءِ، دیوان اٹی نیام تمنگ کن اِلیپنہ۔ وزیر خارجہ پارے کہ او آئی سی دیوان کن سلہ نامہ غاتے گدریفنگانے، اسلام آباد اٹی او آئی سی دیوان پاکستان کن اعزاز اسے۔ اپوزیشن نا بابت وزیر خارجہ شاہ محمود قریشی پارے کہ اپوزیشن پاہک کہ ننتون نمبرآک پورو ءُ، نمبر آک پورو ءُ تو اسلام آباد اٹی دھرنہ غاتا انت گرج ءِ۔ شاہ محمود قریشی پارے کہ گڑاس گڑا ہندن ءُ ہرافتے وزیراعظم قوم اتون شیئر کننگ خواہک، جلسہ نا کمک اٹ وزیراعظم عمران خان قوم ءِ پت اٹ ہلیک۔ اوپارے کہ تحریک بے پتی نا مقابلہ ءِ آئینی و کانودی وڑاٹ کینہ۔ شاہ محمود قریشی پارے کہ غٹ باسک آک تینا آئینی و کانودی زمواری تے جوانی اٹ چارہ۔ شاہ محمود قریشی پارے کہ تحریک بے پتی پیش کننگ اپوزیشن نا آئینی حق ءِ ، بے پتی نا مقابلہ ءِ کننگ ننا آئینی و جمہوری حق ءِ۔ شاہ محمود قریشی پارے کہ پیپلزپارٹی لانگ مارچ کرے، حکومت اسہ جاگہ اس اوفتے توتہو، لانگ مارچ کروک آتے آخبت ہم توننگپک۔