وزیرخارجہ مخدوم شاہ محمود قریشی نا ملائیشیا و انڈونیشیا نا ہم منصب آتون ٹیل فون آ رابطہ

اسلام آباد۔ 15 مارچ (اے پی پی) وزیر خارجہ مخدوم شاہ محمود قریشی سے شنبے نادے آ ملائیشیا و انڈونیشیا نا تینا ہم منصب آتون ٹیل فون آ رابطہ کرے۔ ترجمان دفتر خارجہ نا رداٹ گپ وتران اٹی ہڑتوم آ کنڈآتا تعلقداری و کثیر الجہتی بشخ آتے ٹی ہڑتوم آ کنڈآتا کمکاری ءِ مون آ دننگ تون اوار تین پہ تینی است خواہی نا امور آ گپ وتران کننگا ملائیشین ہم منصب سیف الدین عبداللہ تون گپ وتران کرسا وزیرخارجہ پارے کہ پاکستان و ملائیشیا نا نیام اٹ برادرانہ تعلقداری ءِ۔ بڑزکو کہولی رابطہ غاتا مون آ دننگ آن ہڑتوم آ ملک آتا نیام اٹ ہڑتوم آ کنڈآتا تعلقداری پین سوگو مسنے۔ شاہ محمود قریشی پارے کہ جہانی فورم تیا پاکستان و ملائیشیا نا نیام اٹ نقطہ نظر اٹ ہم آہنگی ، ہڑتوم آ کنڈآتا تعلقداری نا سوگوی نا درشانی ءِ۔ وزیرخارجہ ہڑتوم آ ملک آتا نیام اٹ پارلیمانی رابطہ غاتا مون آ دننگ و پارلیمانی ڈل آتا ہن وبر نا گرج آ زور شاغا۔ وزیرخارجہ ملائیشین ہم منصب ءِ اسلام آباد اٹی اڈہلوک، او آئی سی وزراء خارجہ کونسل نا چل ءُ ہشت می دیوان اٹی بشخ ہلنگ نا سلہ نا درشانی ءِ کرے۔ جمہوریہ انڈونیشیا نا وزیر خارجہ ریٹنو مرسودی تون ٹیل فون آ رابطہ ٹی ہڑتوم آ وزیرخارجہ غاک تین پہ تینی است خواہی نا گیشتر سرحال آتیا گپ وتران کریر۔ اوسیاسی، واپاری و اقتصادی باندات آتون اوار اوار اقوام متحدہ، آسیان، او آئی سی و ایلو کثیر الجہتی فورم تیا کمکاری ءِ پین سوگو کننگ آ امنا کرے۔ ہڑتوم آ وزیرخارجہ غاک ہڑتوم آ کنڈآتا و کثیر الجہتی ، اسیجائی فائدہ غاتا امور آ کمکاری ءِ برجاتخنگ آ امنا کریر۔ انڈونیشیا نا وزیر خارجہ وزیرخارجہ مخدوم شاہ محمود قریشی ءِ انڈونیشیا نا دورہ نا سلہ خلک۔ سلہ ءِ امنا کرسا وزیر خارجہ تین پہ تینی وڑاٹ جوان ءُ تاریخ اسے آ انڈونیشیا نا دورہ ءِ کننگ نا عندیہ تس۔