کوئٹہ۔ 14 مارچ (اے پی پی) پاکستان تحریک انصاف کوئٹہ ڈسٹرکٹ نا ڈپٹی جنرل سیکرٹری حمزہ خان ناصر پارینے کہ پاکستان ننے بھلو جہد اسے آن پد دوئی مسنے آجوئی نا قدر ءِ بایدے کین، 1940 اٹی ہراجوش و جوزہ اتون نظریہ پاکستان نا بنداو ءِ تخنگا او برصغیر نا تاریخ ءِ بدل کرے و مسلمان تیکن جتا ءُ ملک اسے نا بنداو ءِ تخا۔ پاکستان ءِ ننے کس اس تاس اسے ٹی تخسا تتنے بلکن دا ننے تینا پیرہ و باوہ نا جانی و مالی قربانی تیان پد دوئی مسنے ہرانا نن بایدے قدر ءِ کین، پاک فوج ملک انا دفاع کن ہروخت تیار ءِ اگہ کس اس پاکستان نا کنڈآ گندہ انگا خن تیٹی ہُرا تو اونا خن تے کشنہ۔ داہیت ءِ او دوشنبے نادے آ 23 مارچ انا شایان شان وڑاٹ اڈتننگ کن اڈ ہلوک کارندہ غاتا دیوان آن تران کرسا پارے۔ اوپارے کہ دُن تو علامہ اقبال نا خطبہ آلہ آباد اٹی دا مزل نا تعین ءِ کننگاسس ولے داڑآ قومی اجماع 23 مارچ 1940 آ قرارداد پاکستان نا دروشم اٹ مسوسس۔ اوپارے کہ پاکستان نا جوڑ کننگ کن ننا باوہ و پیرہ نہادی جون تے ندر کریر ہرانا سوب آن اینو نن آجوئی اٹ ساہ ہلنگ اُن ننے مرے کہ دا آجوئی نا قدر ءِ کین ۔ اوپارے کہ 23 مارچ ننا تاریخ نا روشنا ءُ دے اسے ، قائد اعظم و تحریک آجوئی نا ایلو راہشونک تینا بدل مفروک عزم و بصیرت افروز کماشی نا سوب آن برصغیر نا مسلمان تے اسہ پلیٹ فارم اسے آ مچ کریر و اوفتے کن جتا ءُ وطن اس جوڑ کریر نن تینا آجوئی و تینا بزرگ آتا تروک آ قربانی تا قدر ءِ کین۔ اوپارے کہ اینو پاکستان آ دشمن چندی چم آتے اٹ جلہو کننگ ءِ دشمن خواپک کہ نن امن و سوگوی و شونداری نا کنڈآ کان ہنداخاطرآن او پاکستان اٹ بدامنی تالان کننگ کن چم کننگ ءِ ۔ اوپارے کہ پاکستانی قوم ہراوڑ وطن نا دفاع کن پاکستان نا فوج اتون تفے و اوفتے تون ہم کوپہ سلیس داڑآن دشمن ءِ دا کلہو رسینگانے کہ پاکستان قائم و دائم مننگ کن جوڑ مسنے و دانا کنڈآ بش مروک آ ہر گندہ انگا خن ءِ کشنگک، اوپارے کہ پاکستانیک بحیثیت قوم اواری اٹ دہشت گردی نا عفریت نا مقابلہ ءِ کریر دہشت گردی نا برخلاف جنگ اٹ مچ آ قوم تینا سلہہ بند فوج آتون ہم کوپہ سلوک ئس۔ الحمداللہ اینو ننا ملک پرامن ءِ ملک انا دفاع و سلامتی کن ہروڑنا قربانی تننگ کن تیار اُن ۔ اوپارے کہ پاکستان تحریک انصاف 23 مارچ نا دےءِ جم وجوش اٹ اڈ ایتک کارندہ غاک دادے انا رداٹ پبی تیاری کیر۔
