ورناک ملکی زرگزران اٹی اہم ءُ کڑد اس ادا کننگ کیرہ، زالبول آتے آن لائن ای بزنس و پارٹ ٹائم ملازمت آتیٹی وارخواہی فراوان کننگے، صدر مملکت ڈاکٹر عارف علوی نا مسلم یوتھ یونیورسٹی نا کانووکیشن آن تران

اسلام آباد۔ 14 مارچ (اے پی پی) صدر مملکت ڈاکٹر عارف علوی ورناتا لائخی تیان پدی فائدہ ہرفنگ آ زور شاغسا پارینے کہ او ملکی زرگزران اٹ اہم ءُ کڑد اس ادا کننگ کیرہ، اوملکی شونداری ءِ پک کننگ کن زالبول آتے قومی دنگ اٹ اوار کننگ آ ہم زور شاغانے۔ داخیال آتا درشانی ءِ او دوشنبے نادے آ مسلم یوتھ یونیورسٹی نا اولیکو کانووکیشن آن تران کرسا کرے۔ صدر مملکت پارے کہ زالبول آتے زرگزرانی شونداری ٹی بریبر شریدار نا وڑاٹ وارخواہی ملپک ہرانا سوب آن ملک اٹی حقی شونہالی بتنے۔ اوزالبول آتے واکدار کننگ کن اوفتا اواری ءِ پک کننگ و السی ہند آتیا اوفتے کن وارخواہی ودی کننگ آ زور شاغا۔ اوپارے کہ زالبول آتےآن لائن ای بزنس و پارٹ ٹائم ملازمت آتیٹی وارخواہی فراوان کننگے تانکہ او تینا کسب تون وابستہ مریر۔ اوپارے کہ ورناتیکن سرسہب ورناپروگرام و بینک آتا کنڈآن جاری ایلو وام اسکیم تا سوب آن بھلو وارخواہی اس ودی مسنے۔ گریجویٹ آک دا وارخواہی تیان فائدہ ہرفر و تینا کسبی بشخ آتیٹی سرسہبی دوئی کیر۔ اوگریجویٹ آتیا زور شاغا کہ او تینا زند اٹ سرسہبی کن ایمانداری، دیانتداری نا درشانی ءِ کیر۔ انسانیت آن بیدس تعلیم نا ہچ ءُ اہمیت اس اف۔ اوپارے کہ دنیا مہاجر آتیا درگہ ءِ بند کرسا انسانی قدر ءِ گوجالنگ ءِ۔ پاکستان لکھ آ اوغان مہاجر آتا کیہی عشرہ غاتسکان میزبانی ءِ کرسا اخلاقی قدر انا درشانی ءِ کرے۔ صدر مملکت چندی بشخ آتیٹی پوزیشن دوئی کروک آ گریجویٹ آتیٹی ایوارڈ بشخا۔