چیلنج آتیان پد ہم حکومت چندی بشخ آتیٹی اصلاحات درستی راستی کرفنگ کن سنبرینگوک ءِ، بنجائی وزیر خزانہ

اسلام آباد۔ 14 مارچ (اے پی پی) بنجائی وزیر خزانہ و محصولات شوکت ترین پارینے کہ چیلنج آتیان پد ہم بھلو وخت اسے آن زیر التوا پنجر جاتی ویل آتون مون تننگ و پائیدار و جامع نمونا دوئی کننگ کن حکومت چندی بشخ آتیٹی اصلاحات درستی راستی کرفنگ کن سنبرینگوک ءِ۔ اوداہیت ءِ دوشنبےنادے آ داڑے ایشیائی شونداری بینک انا نائب صدر شاکسین چن تون اوڑدہی ٹی پارے۔ داوخت آ پاکستان اٹ ایشیائی شونداری بینک انا کنٹری ڈائریکٹر یانگ یی، سیکرٹری خزانہ و سینئر آفیسر آک ہم ساڑی ئسر۔ ایشیائی شونداری بینک انا نائب صدر نا ستاءِ کرسا وزیرخزانہ پارے کہ بینک اصلاحات نا ایجنڈا ءِ مون آ دننگ و ملک اکن چندی شونداری ڈٹ آتے نافذ کننگ اٹ مدام پاکستان نا کمک ءِ کرینے۔ وزیر خزانہ پارے کہ توانائی، مالیات، وام تا بست وبند وراجی و اقتصادی شونداری تون اوار اولیتی بشخ آتیٹی المی اصلاحات اتنگ کن اسہ اہم ءُ شریدار اسے نا وڑاٹ ایشیائی شونداری بینک و پاکستان نا نیام اٹ دیرینہ شریداری و پکا عزم ءِ۔ وزیر خزانہ ملک انا زرگزرانی حالیت آتا بابت پارے کہ حکومت چیلنج آتیان پد ہم بھلو وخت اسے آن زیر التوا پنجر جاتی ویل آتون مون تننگ و پائیدار و جامع نمو نا دوئی کننگ کن چندی بشخ آتیٹی اصلاحات درستی راستی کرفنگ کن سنبرینگوک ءِ۔ وزیر خزانہ پارے کہ حکومت خراج نا بنداو ءِ ودفنگ، ریٹیل سیلز انا کچ آن پورو فائدہ ہرفنگ، سنگل ونڈو آپریشن تتون اوار اوار ٹریک و ٹریس نظام نا کمک اٹ محصولات آتا وصولی ءِ گچین کننگ کن کہی گام گیج کرینے۔ اوسرسہب پاکستان پروگرام نا کمک اٹ راج انا زرگزرانی وڑاٹ پسماندہ تپہ نا کمک کن کروک آ گام گیج آتا ہم حوالہ ءِ تس۔ ایشیائی شونداری بینک انا نائب صدر پاکستان نا زرگزران اٹ گچینی کن راجی و اقتصادی بشخ آتیٹی ساڑی حکومت نا کنڈآن کروک آ کوشست آتا ستاءِ کرے و اوفتا مخ تفی ءِ کرے۔ اواصلاحات نا پروگرام ءِ سوگو کننگ و ملک انا شونداری ایجنڈا بشمول مالیاتی نظام، لچک ودی کننگ، مسابقت ءِ ودفنگ و نجی بشخ انا شونداری کن کمکاری ءِ برجاتخنگ کن بینک انا عزم انا درشانی ءِ کرے۔ وزیر خزانہ شوکت ترین ایشیائی شونداری بینک انا نائب صدر و اونا ٹیم انا پدریسہ کمک و آسراتی فراوان کننگ آ منت واری ءِ ہرفے۔