نن بے پتی نا تحریک نا مقابلہ ءِ کینہ، وزیر خارجہ شاہ محمود قریشی نا پریس کانفرنس

اسلام آباد۔ 14 مارچ (اے پی پی) وزیر خارجہ شاہ محمود قریشی پارینے کہ نن انشاء اللہ تحریک بے پتی نا پبی مقابلہ ءِ کینہ و اپوزیشن ءِ شکست ایتنہ۔ دوشنبے نادے آ پریس کانفرنس آن تران کرسا وزیر خارجہ پارے کہ کنا بلاول آن خواست مریک قومی و آئینی ادارہ غاتے سیاست اٹ گر کننگ جوان اف، نن انشاء اللہ بے پتی نا تحریک نا مقابلہ ءِ کینیہ و اوفتے شکست ایتنہ۔ اوپارے کہ بلاول آرٹیکل 6 انا ذکر ءِ کیک، آئین غٹ اکن مقدس ءِ۔ وزیر خارجہ بلاول آن اَریفینے کہ ہراتم نی و نا باوہ نوٹ آتا تھیلہ کن باسک آتا درگہ غاتیا ہنسا پانننگ اُورے کہ تینا وفاداری تے بدل کبو تو انت دا سوغندآن روگردانی اف؟ آئین نا رد ءِ نی و نا باوہ زہمی کننگ اورے ، دا غیرآئینی چم آتیان است کنڈ مبو۔ شاہ محمود قریشی پارے کہ است آن دپبو کہ ہندن ءُ بندغ ہم ارے ہرافک ننے بسنو پارینو کہ نم اوفتے تون انت گپ وتران کننگ اورے۔ بحیثیت سیاسی کارندہ کنے و کنا جماعت ءِ تینا سیوتی تیا پورو پت ءِ، اوبھاز ساف ءُ بندغ ءُ اوہرمشکل وخت اٹ ننتون تفینو و او اپوزیشن نا غٹ چال آتے پہہ مریرہ۔ او غٹ آزموندہ کار سیاست دان ءُ و کس اسے نا ریفنگ اٹ بفسہ۔ اوپارے کہ پاکستان نا باشعور الس سرپند مریک کہ اوفتا’’ان ہولی الائنس‘‘ نا شیرازہ بھاز زوت تالان مریک انتئے کہ اپوزیشن سیوت اٹ اوار جماعت آتا اسہ نظریہ و اسہ سوچ اس اف۔ وزیر خارجہ سوج ہرفینے کہ انت بلاول پیپلزپارٹی نا آئیڈیا لوجی ءِ مولانا نا آئیڈیالوجی اٹ ضم کرینے؟ انتئے کہ نون لیگ انا تینا سوچ ءِ اگہ ناخیال ءِ کہ مریم نواز آخبت نا لیڈر نمے سرپند مریک تو دا نا غلط گمانی ءِ ، نا نئے نظریہ، نئے سرکڑدہ و نئے منشور اسٹ ءِ۔ اوپارے کہ پاکستان نا ہر ذی شعور شاری پہہ مسنے کہ دا ان ہولی الائنس نا مسخت عمران خان ءِ اینک کننگ ءِ۔ مخلوق داہیت انا تہہ اسکان سرمسنے کہ نم عمران خان آن خوفزدہ انت اکن اورے؟ وزیر خارجہ پارے کہ انت دا بے پکی نا کیفیت آن پاکستان نا زرگزران ءِ فائدہ رسینگ انگ ءِ؟ انت دا بے پکی نا کیفیت اٹ نم اوغانستان نا مخلوق نا خذمت ءِ کننگ اورے۔ نم دنیا ءِ کنفیوزڈ سگنل انت اکن تننگ خوارے؟ اوپارے کہ کنے یخین ءِ کہ اوفتے زوت بھاز مایوسی مریک۔ ننے او آئی سی نا دیوان نا اہمیت نا علم ءِ۔ انشاء اللہ 22 و 23 مارچ آ او آئی سی وزراء خارجہ کونسل نا چل و ہشت می دیوان اسلام آبا داٹی اڈ ہلیک۔