کابینہ نا خصوصی کمیٹی پاکستان و برطانیہ نا نیام اٹ ریٹرنز اینڈ ری ایڈمیشن معاہدہ ءِ گڈیکو دروشم اس تس، ڈوہدار آتا حوالگی نا معاہدہ غا پین سلابت کننگک

اسلام آباد۔ 14 مارچ (اے پی پی) کابینہ نا خصوصی کمیٹی پاکستان و برطانیہ نا نیام اٹ ریٹرنز اینڈ ری ایڈمیشن معاہدہ ءِ گڈیکو دروشم اس تس وخت اس کہ ڈوہدار تا حوالگی نا معاہدہ غا پین سلابت کننگک۔ وزارت داخلہ نا کنڈآن دوشنبے نادے آ جاری بیان نا رداٹ پاکستان و برطانیہ نا نیام اٹ ریٹرنز اینڈ ری ایڈمیشن و ڈوہدار حوالگی معاہدہ غاتا بابت وزارت داخلہ ٹی خصوصی دیوان اس اڈ ہلک۔ دیوان نا کماشی ءِ بنجائی وزیر داخلہ شیخ رشید احمد کرے وخت اس کہ وزیر خارجہ مخدوم شاہ محمود قریشی و بنجائی وزیر انسانی حق شیریں مزاری آن بیدس سلاہکار داخلہ احتساب و داخلہ بریگیڈیئر ڈ مصدق عباسی و بنجائی سیکرٹری داخلہ یوسف نسیم کھوکھر تون اوار ایلو بڑزکو کامدارآک بشخ ہلکر۔ بیان نا رداٹ کابینہ منظوری آن پد کمیٹی پاکستان و برطانیہ نا نیام اٹ ریٹرنز اینڈریڈ امیشن معاہدہ ءِ گڈیکو دروشم اس تس۔ برطانیہ غان گڈیکو سلابت آن پد معاہدہ ءِ پاکستان و برطانیہ نا نیام اٹ معاہدہ ءِ دستخط کن پیش کننگک۔ کابینہ منظوری آن پد معاہدہ نا مسودہ تدوک آ تُو سلابت کن برطانوی حکومت آ گدریفیسس۔ معاہدہ ءِ پاکستان و برطانیہ نا نیام اٹ دستخط کن زوت پیش کننگک۔ معاہدہ غان نئے بیرہ ہموشاری تے پدی اتنگ نا موکل مریک ہرافتے تعلقدار عدالت آک سزا بنفوک مریر۔ کابینہ کمیٹی پاکستان و برطانیہ نا نیام اٹ ڈوہدار آتا حوالگی نا معاہدہ ءِ ہم زوت پورو کننگ نا فیصلہ کرینے، دا بابت پین سلابت کننگک۔ یات سلے کہ ڈوہدار حوالگی معاہدہ طے مننگ آن پاکستان و برطانیہ نا نیام اٹ سزا کنوک بندغ آتا حوالگی ممکن مننگ کیک۔