خواجہ سعد رفیق و خواجہ سلمان رفیق نا برخلاف پیراگون ہاؤسنگ سوسائٹی ریفرنس نا سماعت 30 مارچ اسکان ملتوی

لاہور۔ 14 مارچ (اے پی پی) لاہور نا احتساب عدالت مسلم لیگ ن نا راہشون خواجہ سعد رفیق و خواجہ سلمان رفیق نا برخلاف پیراگون ہاؤسنگ سوسائٹی ریفرنس اٹ نیب استغاثہ نا اِرا گواہ تا بیان تے قلمبند کننگ آن پد مستی سماعت ءِ 30 مارچ اسکان پدبٹے۔ احتسا ب عدالت نا جج نسیم احمد ورک پیراگون ہاؤسنگ سوسائٹی ریفرنس آ سماعت کرے۔ عدالتی پرمان آ دوشنبے نادے آ قومی اسمبلی نا باسک و مسکوہی بنجائی وزیر ریلوائی خواجہ سعد رفیق، پنجاب اسمبلی نا باسک سلمان رفیق ئسک عدالت اٹ پیش مسر و تینا حاضری ءِ خلفیر۔ سماعت اٹی نیب گواہ فریحہ الطاف و سعیدہ کبیر نا بیان تے قلمبند کننگا۔ خواجہ برادران نا وکیل چوہدری محمد نوعاز و محمد اورنگزیب نا ساڑی گری ٹی گواہ تا بیان ءِ قلمبند کننگا۔ سماعت اٹی خواجہ سعد رفیق عدالت آن خواست کرے کہ بے ٹیم اسمبلی سیشن نا کال بننگ کیک، ہراسوب آن عدالت آ بننگ مشکل مریک، عدالت دا مقدمہ ٹی مرغن ءُ تاریخ اس ایتے۔ عدالت خواست ءِ منظور کرسا کیس انا سماعت ءِ 30 مارچ اسکان پدبٹے۔ عدالت خواجہ برادران تون اوار وکیل آتے بروک آ سماعت آ دُوارہ بٹنگا۔ احتساب عدالت نا روبرو پیراگون ہاؤسنگ سوسائٹی ریفرنس کیس اٹی داتم اسکان 26 گواہ تینا بیان تے قلمبند کرفینو، خواجہ برادران نا برخلاف جم وڑاٹ 130 گواہ بیان قلمبند کرفرہ۔