اپوزیشن تحریک بے پتی ءِ سرسہب کننگ کن وونٹ آتا ہلنگ و بہاکننگ اٹ لگوک ءِ، بنجائی وزیر داخلہ شیخ رشید احمد

کوئٹہ۔ 12 مارچ (اے پی پی) بنجائی وزیر داخلہ شیخ رشید احمد پارینے کہ قومی اسمبلی ٹی اپوزیشن نا مقدر باتننگ ءِ، اپوزیشن تحریک بے پتی ءِ سرسہب کننگ کن وونٹ آتا ہلنگ و بہاکننگ اٹ لگوک ءِ، ای خل آنبار وزیراعظم عمران خان تون سلوک اُٹ، اوفتیان افٹ ہرا 5 سیٹ آتیا وزارت اعلیٰ کن بلیک میل کیو، وزیراعظم عمران خان تینا آئینی مد ءِ پورو کیک، نادرا بلوچستان نا مخلوق ءِ آسراتی تننگ کن اہم گام گیج کننگ ءِ، زالبول آتیکن نادرا سینٹرآتا کچ و گاڈی تیتی ودکی کننگانے۔ عمران خان نا کماشی ٹی جان جوڑی کارڈ انا بناءِ کننگ کنا پسندیدہ کاریم ءِ ، انصار الاسلام اسلام آباد آ چڑھائی کرے، کس اسے پرائیویٹ ملیشیا جوڑ کننگ نا موکل اف۔  داخیال آتا درشانی ءِ او ہفتہ نادے آ کوئٹہ ٹی ڈپٹی اسپیکر قومی اسمبلی قاسم خان سوری تون اوار ایئرپورٹ روڈ آ نادرا میگا سینٹر و کمپیوٹرائزجانشینی سرٹیفکیٹ نا بناءِ کننگ نا پوسکن آ دفتر نا بنانا وخت آ میڈیا تون گپ وتران کرسا کرے۔ بنجائی وزیر داخلہ شیخ رشید احمد پارے کہ اپوزیشن نا بے پتی تحریک بے سہبی نا گواچی مریک۔ جہانگیر ترین نا جہاز اٹی مخلوق رضامندی اٹ ہنانے، قومی اسمبلی نا باسک آک تینا شہریت کن تھانہ غا ہنار بنجائی نا سیاست کیوہ صوبہ غاتا ہیت ءِ کپرہ۔ اسہ سوج اسے نا ورندی ٹی وزیر داخلہ نا پاننگ ئس کہ بلوچستان عوامی پارٹی عمران خان تون سلوک ءِ، ای ہم خل آنبار عمران خان تون سلوک اُٹ ایلومخلوق نا زموار افٹ۔ شیخ رشید نا پاننگ ئس کہ ای ہموفتیان افٹ کہ 5 سیٹ آتیا صوبہ نا وزارت اعلیٰ کن بلیک میل کیو۔ پارلیمنٹ لاجز اٹی پیش بروک آ واقعہ نا بابت گپ وتران کرسا وزیرداخلہ نا پاننگ ئس کہ پارلیمنٹ لاجز اٹی خاہوت آتے خطرہ ئس 70 بندغ پترینگاسر ، 7 دے مست پارلیمنٹ، پارلیمنٹ لاجز ایف سی و رینجرآتا سپرد کننگ نا فیصلہ کرین، حکومت فوج ءِ ہم بٹنگ کیک ولے  ہیت داسکان داتسکان سرمتنے۔ بنجائی وزیر داخلہ شیخ رشید احمد مستی پارے کہ انصار الاسلام والاتیٹی ہمت ارے تو تحریک بے پتی نادے آ برسا نشان ایتر۔ انصار الاسلام ، بیت الاسلام تون اوار اسہ ملیشیااسے ہم موکل مفک کہ او اسلام آباد اٹی چڑھائی کیر۔ اوپارے کہ نن مانسہرہ و مردان اٹی ہموفتے تورینن، گرج تمنگ آ نن فوج ءِ ہم بٹنگ کینہ۔ اوپارے کہ وزیراعظم عمران خان تون سیخا و خل آنبار سلوک اُٹ، ایلوفتا زموار افٹ، عمران خان سڑک آتیا بس تو او واقعی خطرناک مریک۔ اسہ صحافی اس چیئرمین پی پی پی نا بابت سوج کرے تو شیخ رشید ورندی تس کہ بلاول نا برخلاف کس اس سوج کپ، غصہ کیوہ کاوہ۔ اونا پاننگ ءِ کہ اپوزیشن سگ و بردباری نا درشانی ءِ کے، تحریک بے پتی ٹی اودے بے سہبی مریک، الیکشن ءِ 1 سال اس ارے، دُن مف کہ دافک 10 سال لین اٹ لگر۔ جوان دادے کہ گچین کاری تا تیاری ءِ کیر۔