بنجائی وزیر غلام سرور خان نا راولپنڈی ٹی چندی دود آتیان تران

راولپنڈی۔ 12 مارچ (اے پی پی) بنجائی وزیر ہوابازی غلام سرور خان پارینے کہ وزیراعظم عمران خان دنیا نا اسٹ انگا مسلم حکمران ءِ ہرا امریکہ و یورپین یونین نا خن تیٹی خن تے خلسا ہیت کرے ہرانا سوب آن بے پتی کون آ تحریک مون آ بننگ ءِ، مسکوہی حکمرانک بیرہ تینا جائیداد و پیسہ جوڑ کریر ولے الس کن ہچ اس کتور، پاکستان تحریک انصاف نا حکومت اٹی حلقہ 59 اٹی 05 ارب روپئی نا بھلو خڑچ اسے آن تعلیم، جان جوڑی و سڑک آتا ڈٹ آتون اوار الس نا آسراتی کن آسودہی پروجیکٹ بناکرے۔ داخیال آتا درشانی ءِ بنجائی وزیر غلام سرور خان ہفتہ نادے آ راولپنڈی ٹی چندی آسودہی ڈٹ آتا بناءِ کرسا کرے، داوخت آ پی ٹی آئی نا راہشون و صوبائی اسمبلی نا باسک واثق قیوم عباسی، پاکستان تحریک انصاف راولپنڈی نا راہشون و مسکوہی اومیتدار ایم پی اے چوہدری افضل و پی ٹی آئی نا ہندی سرکڑدہ غاتون اوار کارندہ غاتا بھلو کچ اس ساڑی ئسر۔ بنجائی وزیر پارے کہ وزیراعظم عمران خان نا کماشی ٹی مچ آ ملک آنبار راولپنڈی نا الس ءِ اوفتا درگہ غا غٹ آسراتی تے تننگ انگ ءِ۔ اوپارے کہ کنا حلقہ ٹی تعمیراتی کاریم تتون آسودہی ڈٹ آتیا ترندی اٹ کاریم برجاءِ ہرافتے ٹی خلقی ہند، جان جوڑی انصاف کارڈ، ڈغار سینٹر ز غٹ یونین کونسل آتے ٹی جوڑ کننگ انگ ءِ وخت اس کہ داکان مست راولپنڈی تحصیل اٹ بیرہ اسہ اراضی سینٹر اس ئسک ہرانا سوب آن مخلوق ءِ ویل مون تروک مسکہ۔ اوپارے کہ داکان مست پٹوریک مرمر انگا علاقہ غاتیٹی تینا دفترآتے جوڑ کریسر و تینا علاقہ غاتیٹی ساڑی متویرہ ولے ساڑی حکومت شاری تے مون تروک ویل آتے مون آ تخسا غٹ یونین کونسل اٹ ڈغاری سینٹر جوڑ کننگ ءِ و داڑے محکمہ مال نا غٹ آفیسر آک سوالی تیکن ساڑی مریرہ ہراڑے گچین آسراتی فراوان کننگک۔ غلام سرور خان پارے کہ ننا حلقہ ٹی سی ءُ پنچ سال انا سیاسی تاریخ اٹ اسہ کالج اس ہم جوڑ کننگتویسس و ننا حکومت 7 ڈگری کالج جوڑ کرے، ہسپتال نا ڈٹ پوروی نا آخیریکو ریسہ غاتیٹی ءِ۔ داسال نن اِرا پی سی ون پورو کرینن ہرافتا رداٹ پوسکن آ ہسپتال کڈنی وٹراما سینٹر چکری نا ہند آ جوڑ کننگک۔ اوپارے کہ 24 خلق آتیٹی گیس انا کاریم برجاءِ و ای تینا حلقہ ٹی 100 درسد بجلی فراوان کرینٹ۔ اوپارے کہ حلقہ 59 نا غٹ ویل آک اوفتا درگہ غا ایسر مریرہ، پی ٹی آئی حکومت ءِ مسہ نیم سال مسنے و اخس کاریم دادور حکومت اٹ مس او مہالو اسُل متنے و ساڑی حکومت نا غٹ آن بھلا سرسہبی ءِ کہ پاکستانی شاریک کاٹم ءِ بڑزاکرسا زند ءِ گدریفنگ ءُ انتئے کہ دنیا نا اسٹ انگا مسلم حکمران ءِ ہرا امریکہ و یورپین نا خن تیٹی خن تے خلسا ہیت کرے ہراسوب آن بے پتی کون آ تحریک مون آ بننگ ءِ۔