پاکستان نا بھارتی میزائل نا حادثاتی لانچ آ راستکی تا سہی تعین ءِ کننگ کن اسیجائی جاست وپاست نا خواست

اسلام آباد۔ 12 مارچ (اے پی پی) پاکستان بھارتی میزائل نا حادثاتی لانچ آ راسکتی تا سہی تعین ءِ کننگ کن اسیجائی جاست وپاست نا خواست کرسا پارینے کہ مچ آ واقعہ غان بھارت نا اسٹریٹجک سلہہ غاتون مون تننگ اٹ سنگین وڑنا بھاز انگا نزوری و تکنیکی خامی تا پیدواری مننگ ءِ، پاکستان جہانی برادری آن جوہری چاگڑد اٹ پیش بروک آ سنگین وڑنا دا واقعہ نا سنجیدگی اٹ نوٹس ءِ ہلنگ و ڈیہہ ٹی تزویراتی سوگوی ءِ مون آ دننگ اٹ تینا پبی کڑد ءِ ادا کننگ نا خواست ہم کرینے۔ ہفتہ نادے آ داڑے جاری بیان اٹی ترجمان دفترخارجہ پارے کہ پاکستان انڈین پریس انفارمیشن بیورو نا ڈیفنس ونگ انا اخباری بیان ءِ نوٹ کرینے ہراٹی 9 مارچ 2022 آ ‘‘تکنیکی خرابی’’ نا سوب آن پاکستانی علاقہ ٹی بھارتی میزائل نا ‘‘حادثاتی سم کاری ’’ آ است ہسونی نا درشانی ءِ کننگا و دا رداٹ اندرونی عدالتی جاست و پاست نا فیصلہ کننگانے۔ ترجمان پارے کہ واقعہ نا سنگین وڑسیکورٹی پروٹوکول و جوہری چاگڑد اٹ میزائل آتا حادثاتی یا غیر مجاز لانچ انا توننگ کن تکنیکی رکھی گام گیج آتا بابت چندی بنداوی سوج آتے ودی کرینے۔ ترجمان پارے کہ داوڑنا سنگین باندات ءِ بھارتی کمامدارآتا کنڈآن پیش کروک آ سادہ وضاحت اٹ ایسر کننگ مفک و گڑاس سوج ہرافتا ورندی درکار ءِ۔ ترجمان پارے کہ بھارت ءِ حادثاتی میزائل لانچ و دا واقعہ نا خاص حالیت آتے توننگ کن گام گیج و وڑوڈول نا بایدے وضاحت ءِ کے، بھارت ءِ حادثاتی وڑاٹ میزائل سم کاری ءِ توننگ کن گام گیج و وڑوڈول و ہندا بڑزکو واقعہ نا خاص حالیت آتا بایدے وضاحت ءِ کے۔ بھارت  پاکستانی دنگ اٹ بٹوک آ میزائل نا وڑ و سرجم آتا وضاحت ءِ کے۔ ترجمان پارے کہ بھارت ءِ حادثاتی وڑاٹ یلہ کروک آ میزائل نا پرواز نا کسر و دا آخرکار پاکستان اٹ امر پترینگا نا ہم وضاحت ءِ کے۔ ترجمان سوج کرے کہ انت میزائل تینٹ بھس مننگ نا وڑوڈول آن شپ ئسک؟ اگہ داوڑ ئسک تو حقیقت اٹ انت اکن بے سہب مس؟۔ ترجمان پارے کہ انت بھارتی میزائل معمول نا خیالداری نا رداٹ ہم لانچ اکن تیار تخنگک۔ اوسوج کرے کہ میزائل نا حادثاتی لانچنگ نا بارواٹ بھارت پاکستان ءِ دمدستی وڑاٹ معلومدار کننگ اٹ انت اکن بے سہب مس و بھارت پاکستان نا کنڈآن واقعہ نا پڑو و وضاحت طلب کننگ کن اودے امنا کننگ نا انتظار انت اکن کرے؟ بھارت نا کنڈآن اندرونی عدالتی جاست وپاست نا فیصلہ گنج اس اف انتئے کہ میزائل پاکستانی دنگ اٹ تمانے و پاکستان دا واقعہ نا بارواٹ راستکی تا سہی تعین ءِ کننگ کن اسیجائی جاست وپاست نا خواست کیک۔ ترجمان پارے کہ گونڈ ءُ فاصلہ و ردعمل انا وخت آتا رداٹ، ایلو کنڈآن تینا دفاع ٹی ہروڑنا غلط تشریح ورندی گام گیج آتا بابت سنگین نتیجہ غاتا سوب مننگ کریکہ۔