وزیرحوالکاری و شینکاری فرخ حبیب نا پریس کانفرنس

لاہور۔ 12 مارچ (اے پی پی) وزیر مملکت حوالکاری و شینکاری فرخ حبیب پارینے کہ اپوزیشن والاک اخس کہ چار واسکٹ و شیروانی موغفیر اوفتا آخیریکو مزل اڈیالہ جیل ءِ، وزیراعظم عمران خان نا برخلاف تحریک بے پتی نا بے سہبی آن پد اپوزیشن والاک اسہ ایلو نا برخلاف بے پتی کیرہ ، سیوتیک ننا لاڈلاک ءُ و اوفتے مدام سینہ غا خلسا تخان۔ اووزیراعظم تون تفوک ئسر ، اریر و تفرہ۔ داخیال آتا درشانی ءِ او ہفتہ نادے آ حافظ آباد اٹی پریس کلب اٹی پریس کانفرنس آن تران کرسا کرے۔ وزیرمملکت حوالکاری فرخ حبیب پارے کہ وزیراعظم عمران خان نا برخلاف بے پتی نا بے سہبی آن پد اپوزیشن نا بندغ آک اسہ ایلو نا برخلاف بے پتی کیرہ، سیوتیک ننا لاڈلاک ءُ، و اوفتے مدام سینہ غا خلسا تخانن او وزیراعظم تون ئسرو اریر۔ اوپارے کہ تحریک بے پتی آن مست اسلام آباد ڈی چوک آ بھلا السی مچی آن اپوزیشن نا خنک ملنگرہ، نواز شریف و آصف علی زرداری نا دورا ٹی 400 ڈرون جلہو مس، ولے وزیراعظم عمران خان اقتدار اٹی بننگ آن مست قول کریسس کہ نئے او کس اسے نا مون آ تینے شیف کیک و نئے قوم انا کاٹم ءِ شیف مننگ کن ہلک۔ وزیر مملکت پارے کہ وزیراعظم عمران خان ناموس رسالت و اسلاموفوبیا نا مقدمہ تون ہراوڑ مون تس دنیا اودے امنا کننگ ءِ و وزیراعظم عمران خان درملکی واکدار تے ایبسولیوٹلی ناٹ پارسا قوم انا کاٹم ءِ گمر اٹ بڑز کرینے، ملکی تاریخ اٹ اولیکو وار آجو و وتواجہ خارجہ پالیسی نا بنداو ءِ تخنگانے۔ فرخ حبیب پارے کہ پاکستان ءِ داوخت آعمران خان کون آ دلیر سرکڑدہ و لیڈر نا گرج ءِ۔ الس پرچی والا وزیراعظم ءِ ہچ ءُ وڑاسے ٹی پسند کپک۔ اوپارے کہ اپوزیشن والاک اخس کہ چار واسکٹ و شیروانی موغفیر ولے اوفتا آخیریکو مزل اڈیالہ جیل ءِ۔ اوپارے کہ مولانا فضل الرحمان نا تحریک بے پتی نا بے سہبی نا حالیت اٹ ملک اٹ انارکی نا گڑتی نا بیان ملکی حالیت آتے خراب کننگ نا اشارہ سے ہرادے ہچ ءُ حالیت اسے ٹی سرسہب مننگ کن ہلیپنہ۔ اومستی پارے کہ اپوزیشن نا بندغ و اوفتا چنکا چناک بیرہ تینا کرپشن نا زر ءِ بچفنگ کن سرگرم ءُ، اوفتا ہچ ءُ قومی ایجنڈا اس اف بیرہ ذاتی ایجنڈا ءِ۔