مستین نا حکمران تپہ قومی فائدہ غاتیا جند انا فائدہ آتے اولیت ترسا کرینو، فرخ حبیب

اسلام آباد/حافظ آباد ۔ 12 مارچ (اے پی پی) وزیر مملکت حوالکاری و شینکاری فرخ حبیب پارینے کہ وزیراعظم عمران خان یک شنبے نادے آ حافظ آباد اٹی تاریخی السی جلسہ غان تران کیک، وزیراعظم عمران خان یک شنبے نادے آ حافظ آباد نا دورہ ءِ کیک و حافظ آباد نا تاریخ اٹی غٹ آن بھلا السی مچی آن تران ہم کیک۔ حافظ آباد اٹی میڈیا تون گپ وتران کرسا وزیر مملکت حوالکاری و شینکاری فرخ حبیب پارے کہ حافظ آباد اٹی اسہ یونیورسٹی و ہسپتال اس جوڑ کننگک، داکان بیدس حافظ آباد ضلع ٹی ارب آ روپئی نا شونداری ڈٹ آتیا کاریم برجاءِ، حزب اختلاف آ تنقید کرسا اوپارے کہ مافیاک پاکستان نا ہر اسہ ادارہ ءِ خورک کرینو۔ اوپارے کہ مستین نا حکمرانک پیشن نا ملک ارب آروپئی نا پراپرٹی جوڑ کریر۔ فرخ حبیب مستی پارے کہ نواز شریف، شہباز شریف و آصف علی زرداری تینا غیرکانودی دولت ءِ رکھ کننگ نا کوشست کننگ ءُ۔ اوپارے کہ مستین نا حکمران تپہ قومی فائدہ غاتیا جند انا فائدہ غاتے اولیت ترسا کرینو و ہربندغ چاہک کہ میموگیٹس سکینڈل اٹ آصف علی زرداری ہراملک آن کمک خواہسوسس۔ وزیر مملکت پارے کہ بے پتی نا تحریک بے سہب مریک۔ اومستی پارے کہ حزب اختلاف ملک اٹی ہڑدڑ تالان کننگ خواہک۔ فرخ حبیب پارے کہ پاکستان ترندی اٹ شونداری نا کنڈآ ہناکہ ولے اپوزیشن ءِ ملک انا دا شونداری کیدنگ متو۔ اوپارے کہ کس اسے ہم ملک اٹی بدامنی تالان کننگ نا موکل تفنہ۔ فرخ حبیب پارے کہ وزیراعظم عمران خان قومی دولت ءِ پلسا جائیداد جوڑ کننگ کن اقتدار اٹی بتویسس۔ اوپارے کہ مستین اٹ پاکستان اٹ 400 ڈرون جلہو کننگا ولے وزیراعظم عمران خان قوم ءِ کس اسے نا مون آ شیف مننگ نا موکل تتنے۔