صدر مملکت ڈاکٹر عارف علوی نا دود آن تران

اسلام آباد۔ 11 مارچ (اے پی پی) صدر مملکت ڈاکٹر عارف علوی پارینے کہ طالب علم آک علم انا دوئی کننگ آ خاص چکار تخر، ملک اٹی روایتی تعلیم تون اوار اوار انفارمیشن ٹیکنالوجی نا تعلیم  نا مون آ دننگ المی ءِ، کیریئر کونسلنگ نا بابت دود پاکستان نا ہر صوبہ و ہر اسکول اٹ اڈتننگے، ورناک کیریئر نا گچینی ٹی آخبت نا گرج آتے مون آ تخر، آئی ٹی آن ورناتیکن روزگار نا پوسکن ءُ وارخواہی ودی مننگ ءِ۔ داخیال آتا درشانی ءِ او جمعہ نادے آ داڑے پاک چائنا سینٹر اٹ بنجائی وزارت تعلیم و کسبی تربیت نا کنڈآن کیریئر کونسلنگ نا بابت اڈ ہلوک آدود آن تران کرسا کرے۔ دود اٹی بنجائی سیکرٹری وزارت تعلیم و کسبی تربیت ناہید درانی، ایڈیشنل سیکرٹری محی الدین وانی، چندی یونیورسٹی تا وائس چانسلرآتون اوار تعلیم نا چاہندار و فیڈرل ڈائریکٹوریٹ آف ایجوکیشن نا ماتحت اسلام آباد نا چندی تعلیمی ادارہ غاتا طالب علم آتا بھلو کچ اس ہم ساڑی ئسر۔ صدر مملکت پارے کہ دااہم دود اٹ بشخ ہلنگ اوڑکن خوشی نا سوب ءِ، اودودانا اڈتننگ آ بنجائی وزارت تعلیم و کسبی تربیت نا منت واری ءِ ہرفے۔ صدر پارے کہ بنجائی وزارت تعلیم و کسبی تربیت طالب علم آتا کونسلنگ کن جوان ءُ کاریم اس کرینے ، داوڑنا پروگرام ملک انا غٹ صوبہ غاتیٹی بایدے مرے و اوفتا دنگ ءِ بایدے ودفنگے۔ بنجائی سیکرٹری تعلیم و کسبی تربیت ناہید درانی تینا تران اٹی دود اٹی بشخ ہلنگ آ صدر مملکت نا منت واری ءِ ہرفے۔ اوپارے کہ تعلیم تون اوار ملک انا ہر بشخ اٹ ڈیجیٹلائزیشن مسنے، دنیا بھاز ترندی اٹ بدل مننگ ءِ، طالب علم آتا کیئریر کونسلنگ کن 70 آن زیات ادارہ غاک ایکسپو ٹی اسٹال خلکونو۔ اوپارے کہ طالب علم آتے فیصلہ سازی کرسا احتیاط کروئی مریک۔ داکان مست ایڈیشنل سیکرٹری بنجائی وزارت تعلیم و کسبی تربیت محی الدین وانی صدر مملکت ڈاکٹر عارف علوی ءِ بخیر کرسا پارے کہ پاکستان اٹ ٹیلنٹ نا ہچ ءُ کمتی اس اف۔ دود اٹی بلوچستان آن ہم بھلو کچ اسے ٹی طالب علم آک بشخ ہلنگ ءُ۔ اوپارے کہ طالب علم آتا کیریئر کونسلنگ کن آخبت اٹ داوڑنا پین دود اڈتننگک،۔ مسہ دے ئی ایکسپو ٹی ہائر ایجوکیشن کمیشن، آکسفیم ، نیشنل یونیورسٹی آف سائنس اینڈ ٹیکنالوجی، قائد اعظم یونیورسٹی ، پی ٹی سی ایل، کوڈ فیسٹ، اوجی ڈی سی ایل، وی فن ایجوکیشن تون اوار بھلو کچ اسے ٹی چندی ادارہ غاک طالب علم آتا راہشونی کن اسٹال خلکر۔