صدر مملکت ڈاکٹر عارف علوی نا ایوانِ صنعت و واپار سوات نا ڈل اتون گپ وتران

اسلام آباد۔ 11 مارچ (اے پی پی) صدر مملکت ڈاکٹر عارف علوی ملکی شونداری کن صنعت و کاروبار آتا اہمیت ءِ تالان کرسا پارینے کہ پاکستان نا سیل و سوات نا بشخ اٹی بے پناہ وارخواہی ارے ہرافتیان پبی وڑاٹ فائدہ ہرفنگ نا گرج ءِ ، دا چرجوئی ٹی ورناتے جوان تربیت و راہشونی فراوان کننگے۔ داخیال آتا درشانی ءِ او ایوانِ صنعت و واپار سوات نا ڈل اتون گپ وتران کرسا کرے ہرا عدنان علی نا کماشی ٹی جمعہ نادے داڑے اوڑتون اوڑدہی کریر۔ صدر مملکت پارے کہ صنعت و کاروباری برادری واپاری کچ ءِ ودفنگ و ملکی شونداری ٹی اہم ءُ کڑد اس ادا کننگ ءُ۔ صدر مملکت سوات اٹ سیل و سوات نا بشخ اٹی شونداری نا وارخواہی تا اہمیت ءِ تالان کرسا پارے کہ سیل و سوات نا بشخ اٹی گمان تیان فائدہ ہرفسا ملازمت نا وارخواہی ودی کننگ مریک، دا چرجوئی ٹی ورناتے مہمانداری و قیام  و طعام نا بشخ اٹ تربیت تننگ نا گرج ءِ۔ اوپارے کہ حکومت سرسہب ورناپروگرام نا رداٹ کاروبار بناکننگ کن وام فراوان کننگ ءِ، سوات نا ورناک سیل و سوات و مہمانداری نا بشخ اٹی تینا کاروبار نا بناءِ کیر و وارخواہی تیان فائدہ ہرفر ۔ صدر مملکت پارے کہ حکومت سڑک آتون اوار بنداوی پنجر نا شونداری آن سیل و سوات ءِمون آ دننگ آ چکار کننگ ءِ وخت اس کہ ورناتے کسبکار کننگ کن ہم گام گیج کننگ انگ ءِ۔ داوخت آ ڈل صدر مملکت ءِ تینا ویل آتا بارواٹ ہم معلومدار کرے۔ صدر مملکت ڈل ءِ ویل آتا ایسری ٹی کمکاری نا باور کرفے۔