اپوزیشن بے پتی آن نرنگ نا کسر ءِ اختیار کننگ ءِ، وزیر داخلہ شیخ رشید احمد نا پریس کانفرنس

اسلام آباد۔ 11 مارچ (اے پی پی) وزیرداخلہ شیخ رشید احمد پارینے کہ بے پتی جمہوریت نا بشخ اسے ولے داسہ اپوزیشن والاک بے پتی آن نرنگ نا کسر ءِ اختیار کننگ ءُ، بے پتی آن مست او اسلام آباد اٹی ہڑدڑ اس کننگ خوارہ، زرداری و نواز شریف مولانا فضل الرحمان ءِ کاریم اٹ اتنگ ءُ، ووٹنگ نا دے پارلیمنٹ ہاؤس و لاجز ءِ رینجرو ایف سی نا دوٹی تننگ اُن، ملیشیا نا لویس اٹ بروک آتے اِلنگ پننگک، کانود ءِ دوٹی ہلوک آتا برخلاف سخت کارروائی کینہ۔ جمعہ نادے آ داڑے پریس کانفرنس آن تران کرسا وزیر داخلہ پارے کہ تدوک آ دے ہرا واقعہ مس اونا مذمت ءِ کینہ، انصاف الاسلام آئین نا آرٹیکل 256 نا رداٹ تحلیل کننگانے، پارلیمنٹ لاجز اٹی 362 فیملی رہینگ انگ ءُ، 50 بندغ ءِ لاجز اٹ داخل کننگا، نن 5 گھنٹہ مذاکرات کرین، کامران مرتضیٰ پولیس نا بابت بھاز بے وڑ بولی ءِ کاریم اٹ ایس، پولیس آ بیدادی کننگا و 6 بندغ ٹھپی مسر، پولیس والاک اوفتا ٹھوڑی آ دوخلسا منت کرسا کریر، نن کس انا برخلاف دہشت گردی نا مقدمہ اس کتنون، چنکوپرچہ اس تسن، کانود ءِ دوٹی ہلکر تو بروک آ وار دہشت گردی نا پرچہ مریک۔ وزیر داخلہ پارے کہ اسلام آباد بہارہ کہوٹی پولیس نا کارروائی ٹی دہشت گرد ٹولی ءِ دزگیر کننگانے۔ دہشت تالان کننگ خواپنہ ولے حوال آک گڑاس جوان افس، حوال ءِ کہ مولانا فضل الرحمان و شیخ رشید ءِ زیات خطرہ ءِ۔ نما ایم این اے اسے سیکورٹی درکار ءِ ننے پابو، ولے کانود ءِ دوٹی ہلپبو۔ شیخ رشید پارے کہ خیبرپختونخوا حکومتءِ پارت کننگانے کہ اسہ بندغ اس ہم یونیفارم اٹی اسلام آباد آ بف، ہراملیشیا نا لویس اٹ اسلام آباد آ بس اودے اِلنگ پننگک۔ داہُننگپک کہ دیر اس اخس ءُ بھلو لیڈر اسے یا جماعت اسے نا سروک ءِ۔ مولانا غان خواست ءِ مدرسہ غاتا طالب علم آتے کاریم اٹ اتپ، اوبرانز نا کال ءِ پدی ہلسا جوان کرے۔ نواز شریف و آصف زرداری مولانا فضل الرحمان ءِ کاریم اٹ اتنگ ءُ۔ اوپارے کہ بلاول وزیراعظم عمران خان نا برخلاف نازیبا زبان ءِ کاریم اٹ ایس۔ اوپارے کہ بے پتی جمہوریت نا بشخ اسے ، ولے داسہ اپوزیشن والاک بے پتی آن نرنگ نا کسر ءِ اختیار کننگ ءُ، و بے پتی آن مست اسلام آباد اٹی ہڑدڑ کننگ خوارہ، اگہ اسلام آباد اٹی واقعہ اس مس تو نم نسخان اٹی مریرے، ہراسٹ کانود ءِ دوٹی ہلک اونا برخلاف سخت کارروائی کینہ، دافک 172 باسک اتنگ کپسہ، مولانا فضل الرحمان نمبر آتا ہیت ءِ کیک، شکر ءِ داسہ نم پاننگ اورے فوج نیوٹرل ءِ۔ اوکان پد نما 6 ایم این اے مروئی ءِ ولدا ننے پاپیرے، ووٹنگ نا دے پارلیمنٹ ہاؤس، پارلیمنٹ لاجز و متکن آ ایم این اے ہاؤس رینجرز و ایف سی نا دوٹی مریک، نن خواپنہ کہ ملک اٹ ہندن ءُ واقعہ اس مرے ہرابدنامی نا سوب مرے۔ اوپارے کہ ملک اٹی امن و ایمنی خوانہ و کس اسے ہم کانود ءِ دوٹی ہلنگ نا موکل تفنہ۔ وزیرداخلہ پارے کہ او فک اول مین گیٹ آ کوزہ کریر ولدا تینا بندغ آتے تہہ ٹی کریر، نن کمرہ نمبر 401 آن بیدس ہچ ءُ درگہ اسے خلتون۔ 401 نمبر کمرہ غان 20 بندغ ءِ دزگیر کننگا۔ اوپارے کہ اپوزیشن نا خراب انگا وخت بننگ والا ءِ، دافک وزیراعظم عمران خان تون ذاتی جنگ کننگ ءُ، اگہ دا 172 باسک آتے پورو کننگ کپسہ تو متکن آ تنخواہ غا کاریم کیر۔ اسہ سوج اسے نا ورندی ٹی وزیر داخلہ شیخ رشید احمد پارے کہ یوکرین و روس انا جنگ اٹی وزیراعظم عمران خان بے کنڈ ہلوک ئس۔ نن غٹ ملک آتون گچین تعلقدار ی نا خواہندار اُن۔ ہرادے آ تحریک بے پتی آ ووٹنگ مریک اپوزیشن ءِ پی ٹی آئی آن زیات سیکورٹی فراوان کینہ و ہندادے آ نن کٹسا شکرانہ نا نفل خواننہ۔ اسہ سوج اسے نا ورندی ٹی وزیر داخلہ پارے کہ پولیس بھاز مظلوم مریک۔ اوپارے کہ مولانا فضل الرحمان تون اوار غٹ عالم آتا پن ءِ شرفمندی اٹ ہلیوہ۔