اسلام آباد۔ 11 مارچ (اے پی پی) بھارتی ناظم الامور ءِ دفترخارجہ غا بٹنگسا بھارت آن بروک آ ’’سپر سونک فلائنگ آبجیکٹ ‘‘ نا پاکستانی فضائی دنگ انا بے خار خلاف ورزی آ ترند برانز کننگا۔ فلائنگ آبجیکٹ نہہ مارچ آ پاکستانی وخت انا رداٹ 1843 بجہ غا بھارتی علاقہ ’سورت گڑھ‘ آن پاکستانی دنگ اٹ پترینگا و کم و ود 1850 بجہ غا پاکستان اٹ میاں چنوں شار انا خڑک ڈغار آ تما، ہراڑآن شاری ماڑی تے نسخان رسینگا۔ جمعہ نادے آ ترجمان دفترخارجہ نا رداٹ بھارتی سفارتکار ءِ معلومدار کننگا کہ فلائنگ آبجیکٹ آن نئے بیرہ شاری ماڑی تے نسخان رسینگا بلکن او ڈغار آ انسانی جان تے ہم خطرہ ٹی شاغا۔ داکان بیدس فلائنگ آبجیکٹ پاکستانی فضائی دنگ اٹ کیہی ملکی و جہانی جہاز آتیکن ہم بھلو خطرہ اسے نا سوب جوڑ مسنے، دانا نتیجہ ٹی تہوبازی نا سنگین شکست آتون اوار اوار شاری تا زوال ہم مننگ کریکہ۔ بھارتی ناظم الامور ءِ پاننگاکہ او بھارتی حکومت ءِ پاکستانی فضائی دنگ انا داپاش آن پاش خلاف ورزی نا سخت مذمت آن معلومدار کے ہرا جہانی اصول و ایوی ایشن سیفٹی پروٹوکول نا خلاف ورزی ءِ۔ ترجمان پارے کہ داوڑنا غیر زموارانہ واقعہ غاک فضائی سیفٹی ءِ گوجالنگ و علاقائی امن و سوگوی ءِ خطرہ ٹی شاغنگ نا بابت بھارتی رویہ غاتا ہم ڈیک ءِ۔ پاکستان داواقعہ نا پورو و شفاف جاست وپاست و اونا نتیجہ غاتے پاکستان تون شیئر کننگ نا خواست کرینے و بھارتی حکومت ءِ خبڑدار کننگک کہ او داوڑنا بے پرواہی نا ناخوشگوار نتیجہ غاتے ذہن نشین کے و آخبت اٹ داوڑنا خلاف ورزی تیان بچنگ کن گچین گام گیج کے۔
