لاہور۔ 10 مارچ (اے پی پی) صدر مملکت ڈاکٹر عارف علوی پنچ شنبے نادے آ فور ٹریس اسٹیڈیم لاہور اٹی نیشنل ہارس اینڈ کیٹل شوانا بناءِ کرے۔ داوخت آ وزیراعلیٰ پنجاب سردار عثمان بزدار ، عسکری سرکڑدہ، صوبائی وزیر میاں محمود الرشید وسردار حسنین بہادر دریشک و ایلوفک ہم ساڑی ئسر۔ دامسہ دے ئی میگا ایونٹ 12 مارچ اسکان برجاسلک۔ دا شو غٹ آن اہم راجی و دودوربیدگی پروگرام اسے و پنجاب ءِ بناآن ہی اونا مہمانداری نا اسٹ انگا اعزاز دوئی مسنے۔ دا دود راج انا چندی تپہ و پاکستان نا غٹ صوبہ غاتون اوار آزاد جموں و کشمیر نا گڑاس بشخ آتیان تعلق تخوک آ مخلوق نا نیام اٹ قومی سیوت، یکجہتی و ہم آہنگی نا شاندار درشانی ءِ۔ شش سال آن پد اڈ ہلوک آ ہارس اینڈ کیٹل شو و دانا بحالی پنجاب حکومت نا کشت وکشار ، لائیو اسٹاک ، گوازی، صنعت، دستکاری و دودوربیدگ پین پین ءِ مون آ دننگ کن کروک آ ترند تر گام گیج آتے ٹی اوار ءُ۔ نیشنل ہارس اینڈ کیٹل شو2022 نا اہم پروگرام تیٹی ہلی و اوچ آتا رقص، ٹینٹ پیگنگ ، ساہدار تا مقابلہ، گھڑ سواری، جمپنگ، ملٹری پولیس نا کنڈآن موٹرسائیکل آ ایکروبیٹک سٹنٹ، گرے ہانڈزریس، چھاتہ برادرآتا فری فال، ساہدار تا نمائش و صوبائی گوازی گر آتا مارچ پاسٹ ہم دا ایونٹ نا بشخ اسے ءُ۔ وزیراعلیٰ پنجاب صدر مملکت ڈاکٹر عارف علوی ءِ نیشنل ہارس اینڈ کیٹل شونا سووینئر اس ہم پیش کرے۔ اوکان پد کارکڑد نشان تروک آتے ٹی انعام ہم بشخنگا۔ داڑے داہیت قابل ذکر ءِ کہ صوبائی حکومت ءِ دا میگا ایونٹ نا اڈتننگ اٹ پاک فوج انا کمک ہم دوئی ءِ۔
