اسلام آباد۔ 10 مارچ (اے پی پی) وزیراعظم نا خصوصی کمکار ای کامرس سینیٹر عون عباس بپی پاکستان اٹی ای کامرس نا مون آ دننگ کن ایشیائی شونداری بینک انا کمکاری نا ستاءِ کرینے۔ داخیال آتا درشانی ءِ او پاکستان اٹ ایشیائی شونداری بینک انا کنٹری ڈائریکٹر ینگ یی تون اوڑدہی ٹی کرے۔ اوڑدہی ٹی پاکستان اٹی ای کامرس نا مون آ دننگ کن حکومت نا ڈٹ و دا بابت ایشیائی شونداری بینک انا شریداری نا گمان تا جاچ ءِ ہلنگا۔ خصوصی کمکار اے ڈی بی نا کنٹری ڈائریکٹر ءِ پارے کہ ساڑی حکومت انفارمیشن ٹیکنالوجی و ای کامرس ءِ مون آ دننگ آ خاص چکار کننگ ءِ و دا گام گیج آتا سوب آن پاکستان اٹی دا بشخ ترندی اٹ مون آ ہِننگ ءِ۔ اوپارے کہ پاکستان اٹ ای کامرس نا بشخ اٹی بھلو وارخواہی اس ارے۔ حکومت دا بشخ اٹی اسٹارٹ اپس و ایلو اختراعی ڈٹ آتا است بڈی ءِ کننگ ءِ ۔ خصوصی کمکار پاکستان اٹی ای کامرس نا بشخ انا مون آ دننگ کن ایشیائی شونداری بینک و ایلو شونداری شریدارآتا گچین کمکاری آ زور شاغا۔ خصوصی کمکار واپار پورٹل کن ایشیائی شونداری بینک انا کمکاری نا ستاءِ کرے و پارے کہ دا ویب پورٹل پاکستان اٹ آن لائن واپار وکاروبار نا اسہ بھلو مرکز اس جوڑ مسنے۔
