اسلام آباد۔ 10 مارچ (اے پی پی) بنجائی وزیر خزانہ و محصولات شوکت ترین پارینے کہ حکومتی گام گیج آک زرگزران ءِ سہی کسر آ شاغانو و ملکی زرگزران داوخت آ سوگو مرسا مون آ ہِننگ ءِ، زرگزرانی مشکل آتیان پد ہم راج انا زرگزرانی وڑاٹ نزور تپہ غاتے ریلیف فراوان کننگ کن پیکج تننگا، داسہ ہم نیزگار بندغ آتے کن پبی گام گیج کننگ نا گرج ءِ۔ اوداہیت ءِ پاکستان نا پائیدار شونداری نا بابت اے سی سی اے نا کنڈآن سیمینار آن تران اٹی پارے۔ اوپارے کہ حکومت چندی گام گیج کرسا زرگزران ءِ سہی کسر آ شاغانے، حکومت کورونا دین اتون مون تننگ کن و زرگزران ءِ بچفنگ کن گام گیج کرے، زرگزران ءِ بچفنگ کن کورونا دین اٹی تاریخی ریلیف پیکج تننگا و لس بندغ ءِ تنکی آن بچفنگ کن سوگو حکمت عملی اس اختیار کننگا۔ وزیر خزانہ پارے کہ گچین پالیسی، حکمت عملی، عملدرآمد و گام گیج آتیان گچینی ممکن مس۔ وزیر خزانہ پارے کہ زرگزران نا گچینی کن مالیاتی مینجمنٹ کن سخت گام گیج کننگا، حسابات جاریہ نا کھاتہ غاتا نسخان و زرتس نا بابت ویل مون تروک ئسک، دین انا سوب آن گروتھ منفی کہول اسکان تما ولے دا مشکل آتیان پد ہم حقدار و زہمی تیکن ریلیف پیکج ایسن۔ کورونا دین انا انسانی زند و زرگزران ءِ بچفنگ نا پاکستان نا گام گیج آتا جہانی کہول آ اعتراف ءِ کننگا۔ وزیر خزانہ پارے کہ کشت وکشار ملکی زرگزران اٹ تمبہ نا حیثیت تخک، حکومت کشت وکشار و برآمدی بشخ آتیا خاص چکار کرے، ہراڑآن نئے بیرہ فصل آتا پیدوار اٹی ودکی مس بلکن زرگزران منفی آن بش مرسا 5.6 نا کہول آ سرمس۔ اوپارے کہ اگہ زرگزران گچین وڑاٹ ودسا ہنا تو آئی ایم ایف آ ہنوئی تمپ، ترسیلات زر و برآمد آتا ہم زرگزران نا گچینی ٹی اہم ءُ بشخ اسے۔ اوپارے کہ مالیاتی شفافیت اتنگ آن زرکارآتا پت بحال مسنے، روزگار و زرکاری کن سازگار چاگڑد اس فراوان کننگا، دا وخت آ 5 درسد نا کچ آن زرگزران نمو مننگ ءِ۔ وزیرخزانہ پارے کہ داسہ ہم نیزگار بندغ آتیکن پبی گام گیج کننگ نا گرج ءِ انتئے کہ جہانی تنکی و کبینی آن نیزگار تپہ غٹ آن زیات زہمی مننگ ءِ، داوخت آ ننا چکار زہمی و کم کٹیا تخوک تپہ غاتے نت تیا سلفنگ آٹے۔ اوپارے کہ فصل آتا گچین پیدوار آن کشت وکشار نا بشخ اٹی ہم نمان گچینی بننگ ءِ و پاکستان نا زرگزران داوخت آ سوگو مرسا مون آ ہِننگ ءِ۔
