اسلام آباد۔ 09 مارچ (اے پی پی) صدر مملکت ڈاکٹر عارف علوی کاروبار و صنعت اٹ جدت اتنگ کن انفارمیشن ٹیکنالوجی ءِ کاریم اٹ اتنگ نا گرج آ زور شاغسا پارینے کہ کاروباری برادری زرگزران نا شونداری و مخلوق ءِ روزگار نا فراوانی ٹی نمان کڑد اس ادا کننگ کیک، دنیا زرکاری کن پاکستان نا کنڈآ ہُننگ ءِ، حکومت آئی ٹی سیکٹر اٹ بھاز زیات آسودہی تسنے وخت اس کہ او کاروباری برادری ءِ غٹ آسراتی فراوان کننگ ءِ۔ داخیال آتا درشانی ءِ او داڑے ایوان صدر اٹی لاہور چیمبر آف کامرس اینڈ انڈسٹری نا کنڈآن ایوارڈز نا دود آن تران کرسا کرے۔ دود اٹی لاہور چیمبر آف کامرس اینڈ انڈسٹری نا عہدیدار، درملکی سفارتکار و ایلو نمان شخصیت آک ہم ساڑی ئسر۔ صدر مملکت پارے کہ حکومت آئی ٹی نا بشخءِ اخس آسودہی تسنے ہموخس پین بشخ اسے ٹی تننگ تنے، آئی ٹی انڈسٹری ءِ تربیت یافتہ افرادی قوت نا بھاز زیات گرج ءِ، مستین اٹ ٹیکسٹائل انڈسٹری بند مسوسس ہرادے ساڑی حکومت بحال کرینے۔ اوپارے کہ پاکستان اٹ ہیومن ریسورس نا کمتی اف، انفارمیشن ٹیکنالوجی ٹی شونداری نا نتیجہ ٹی ننا مخلوق نا روزگار ودک، حکومت ورناتے ڈیجیٹل اسکلز نا کنڈآ راغب کننگ ءِ و داتم اسکان دا پروگرام نا رداٹ 22 لکھ ورناتے تربیت تننگانے ہرا اسہ بھلو پیش رفت اسے۔ صدر پوریاگر آتا زور شاغا کہ او کاروبار و صنعت اٹ جدیدیت آ زرکاری کیر و انفارمیشن ٹیکنالوجی ءِ کاریم اٹ اتسا فائدہ ہرفر۔ صدر مملکت پارے کہ ساڑی حکومت کاروباری برادری ءِ غٹ آسراتی فراوان کننگ ءِ، حکومت نا گچین پالیسی تا سوب آن بزغرآتے ودکی 1100 سد ارب روپئی کٹیا دوئی مسنے، ملکی زرگزران ءِ گچین کننگ کن حکومت و پوریا گر اواری اٹ کاریم کننگ ءُ و دا گام آن واپار و انڈسٹری ءِ ہم فائدہ مریک۔ اوپارے کہ کسبکار افرادی قوت نا تیاری آن کاروباری برادری ءِ ہم فائدہ مریک، آئی ٹی ٹی مون آ ہِننگ کن حکومت ءِ پوریاگرتا کمک درکار ءِ، آئی ٹی سیکٹر زالبول آتے واکدار کننگ نا بھلو ذریعہ اسے، حکومت ورناتا فنی تربیت کن سکل ڈویلپمنٹ پروگرام نا بناءِ کرینے دا گام انا مسخت ورناتے کسبکار و زرگزرانی وڑاٹ خودکفیل کننگ ءِ۔ صدر پارے کہ ساڑی حکومت آئی ٹی سیکٹر کن ریکارڈ آسودہی تا پڑو کرینے و آئی ٹی انڈسٹری ءِ مون تروک ویل آتا دمدستی ایسری ءِ ہم پک کرینے۔ مستین نا اسہ حکومت اس ہم ساڑی حکومت نا کنڈآن پوریاگر برادری ءِ تروک آ آسراتی تا مقابلہ ءِ کننگ کپک۔ صدر ڈاکٹر عارف علوی پارے کہ حکومت نا کاروبار دوست پالیسی تا سوب آن ٹیکسٹائل نا بشخ بحال مس و صنعتی بشخ کم و ود 900 ارب روپئی ودکی کٹیا کرے۔ صدر پارے کہ آئی ٹی نا بشخ اکن المی ءِ کہ او تعلیمی ادارہ غاتون تعلق ودی کے تانکہ روزگار نا وارخواہی ودی کننگ تون اوار اوار مارکیٹ نا گرج آتے ہم پورو کننگ مرے۔ اوپارے کہ طالب علم آک حکومت نا پڑوکروک ڈیجیٹل مہارت آتا کورس اٹ اواری اختیار کریر، فائدہ ہرفنگ و مر مر انگا علاقہ غاتیان تعلق تخوک آ گڑاس طالب علم کم و ود یک و نیم لکھ ڈالر کٹیا کننگ ءُ۔ ڈاکٹر عار ف علوی پارے کہ آئی ٹی سیکٹر زالبول آتے اُرا ٹی مرسا کاریم کننگ نا موکل ترسا واکدار کننگ اٹ اہم ءُ کڑد اس ادا کننگ ءِ۔ اوآئی ٹی کمپنی تیا زور شاغا کہ او دا بشخ اٹی زالبول آتا شمولیت نا است بڈی ءِ کیر۔ صدر مملکت پارے کہ پین بشخ اس آئی ٹی سیکٹر کون آ کٹیا اتنگ کپک، کشت وکشار، ٹیکسٹائل ، فارما و آئی ٹی نا صنعت آتیٹی گمانی چینی زرکاری آن پد پاکستان نا آخبت روشنا مریک۔ دود آن لاہور چیمبر آف کامرس اینڈ انڈسٹری نا صدر میاں نعمان اکبر تران کرسا پارے کہ ایوارڈ نا دود چیمبر نا 100 سال پورو مننگ نا وخت آ اڈ ہلک۔ داکان مست صدر مملکت دود اٹی آئی ٹی ڈٹ آتے سرسہبی اٹ چلیفنگ آ زالبول آتون اوار کاروباری بندغ و چندی بشخ آتیٹی نمان کارکڑد نا درشانی کروک آتے ٹی ایوارڈ بشخا۔
