پاکستان و بھارت نانیام اٹ امریکہ ناثالثی ننا فائدہ ٹی مریک، سیدہ عابدہ حسین
اسلام آباد۔ 18اپریل (اے پی پی) مسکوہی سفیر سیدہ عابدہ حسین نا پاننگ ئِ کہ امریکہ نا قومی سلامتی نا سلاہکار نادورہ پاکستان خوش آئند ئِ۔ ریڈیو پاکستان تون ہیت وگپ کرسا اوپارے کہ امریکہ ٹی پوسکن آ انتظامیہ نا جوڑ مننگ آن پد امریکی قومی سلامتی نا سلاہکار لیفٹیننٹ جنرل ایچ آرمیک ماسٹر نا دورہ پاکستان خوش آئند ئِ۔ عابدہ حسین پارے کہ ننے امریکہ تون تعلقداریک بھاز کبین تمانو ولے ولدا ہم پاکستان و امریکہ نا نیام اٹ تعلقداریک ہراجاگہ غاٹی ئُ ہموجاگہ غا تخنگ نا بایدے کوشست کننگے۔ اسہ سوج اسے نا ورندی ٹی اوپارے کہ پاکستان نا پالیسی ئِ کہ ڈیہہ تون اوار ایلو دنیا تون تعلقداری تے گچین تخنگے ہنداسوب ئِ کہ بھلو وخت اسے آن پد پاک روس تعلقداریک گچینی نا کنڈاہِننگ ئُ ۔ اوپارے کہ روس ڈیہہ ٹی جوان ئُ ساکھ اسے نا ملک ئِ و نن اوڑتون تعلقداری تے گچین جوڑ کرسا تینا واپار ئِ مون آ دننگ و دفاع ئِ سوگو جوڑ کننگ کینہ۔ مسکوہی سفیر پارے کہ روس اتون تعلقداری امریکہ ئِ جوان لگے یا نہ ننے مون آ ہنوئی مریک۔ پاک بھارت ویل انا ایسری نا بابت ہیت کرسا اوپارے کہ اگہ صدر ٹرمپ ئِ دا ادراک مرے کہ پاکستان و بھارت نا نیام اٹ تعلقداری تے گچین کرفنگ اٹی اونا کڑد آن اونا جہانی وقار بڑز مریک تو اودے ہڑتوم آملک آتا نیام اٹ ثالثی نا کڑد ئِ بایدے ادا کروئی مرے و داہیت ننا فائدہ ٹی ئِ۔
