پاکستان و بھارت نانیام اٹ مون آ ہنوک آ اسٹ انگا کسر کشمیر تون اوار غٹ ایسر نا چاری ویل آتا بامسخت ہیت و گپ نا کمک اٹ ایسری ئِ، پاکستان اوغان تنکی نا ایسری نا جاچ اکن جہانی برادری تون اواری اٹ کاریم کننگ کن تیار ئِ ، وزیراعظم محمد نواز شریف
اسلام آباد۔ 17 اپریل (اے پی پی) وزیراعظم محمد نواز شریف پارینے کہ پاکستان امریکہ تون سوگو و تین پہ تینی بنداو آ شریداری خواہک و ڈیہہ و اوڑآن مون آ امن و سلامتی نامون آ دننگ کن پوسکن آ امریکی انتظامیہ تون اواری اٹ کاریم کننگ خوائک۔ اوداہیت ئِ دوشنبے نا دے داڑے امریکی قومی سلامتی نا سلاہکار لیفٹیننٹ جنرل ایچ آر میک ماسٹر تون اوڑدہی ٹی ہیت وگپ کرسا پارے۔ وزیراعظم اوغانستان نا خراب سیکورٹی حالیت آتیا گڑتی نا درشانی ئِ کرسا پارے کہ پاکستان اوغان تنکی نا ایسری نا جاچ ئِ ہلنگ کن جہانی برادری تون اواری اٹ کاریم کننگ کن تیارئِ۔ امریکی قومی سلامتی ناسلاہکار لیفٹیننٹ جنرل میک ماسٹر نا امریکی قومی سلامتی ناسلاہکار نا حیثیت آن پاکستان کن دا اولیکو دورہ ئِ۔ وزیراعظم امریکی قومی سلامتی ناسلاہکار نا خیرمقدم ئِ کرسا اودے تینا حکومت نا ہمو کوشست و گام گیج آتیان معلومدار کرے ہرافتے ٹی سلامتی نا جم اٹنگا حالیت آتیٹی نمان گچینی بسنے و ملک اٹی معاشی شونداری نا کسر ہموار مسنے۔ وزیراعظم پارے کہ جہانی برادری پوسکن آ پاکستان نا جوزہ غاتون مروک آ شوندساری نا پورو ستائِ کننگ ئِ۔ اوپارے کہ اونا حکومت دہشت گردی و انتہاپسندی نا چٹفنگ کن جامع امنائی اس ودی کرے و معیشت اٹی ڈھانچہ جاتی اصلاحات آن اسہ معتدل و شونداری پسند وجمہوری اسلامی ملک اسے نا بنداو ئِ تخا ہرا امریکہ و دنیا تون کاریم کننگ کن تیار ئِ۔ وزیراعظم محمدنواز شریف بھارت تون تعلقداری تا بابت پارے کہ پاکستان و بھارت نا نیام اٹ مون آ ہِننگ نا اسٹ انگا کسر کشمیر تون اوار غٹ ایسر ناچاری نابامسخت ہیت وگپ نا کمک اٹ ایسری ئِ۔ اوپرامن ہمسائیگی کن تینا کمٹمنٹ نا اعادہ کرسا امریکی قومی سلامتی ناسلاہکار ئِ بھارت واوغانستان توتعلقداری تے کن پاکستان نا گام گیج آتیان معلومدار کرے۔ وزیراعظم پاکستان و بھارت نانیام اٹ اختلاف ناایسری خاص کر کشمیر نا ویل اناایسری نا چرجوئی ٹی کمک تننگ کن امریکی صدر ٹرمپ نا آمادگی ناخیرمقدم ئِ کرے و پارے کہ داڑآن ڈیہہ ٹی پائیدار امن و سلامتی و شونہالی ٹی کمک رسینگ انگ کیک۔ امریکی قومی سلامتی نا سلاہکار وزیراعظم ئِ امریکی صدر ٹرمپ انا نیک است خواہی تے سرکرے و اودے باوری ترفے کہ پوسکن آ امریکی انتظامیہ ہڑتوم آ کنڈآتا تعلقداری تے سوگو جوڑ کننگ، اوغانستان و سویلی ایشیاناڈیہہ ٹی امن و سوگوی نا دوئی کن پاکستان تون کاریم کننگ کن پرعزم ئِ۔ پاکستان نا دورہ غا بروک آ امریکی ڈل اتون اوار امریکی سفیر ڈیوڈ ہیل ، قائم مقام خصوصی نمائندہ اوغانستان و پاکستان لارل ملر، سویلی ایشیاءکن قومی سلامتی ناسینئر ڈائریکٹر مادام لیز کرٹس و پاکستان کن قومی سلامتی ناڈائریکٹر جان جے وائز اوار ئسر۔ داوخت آ وزیر خزانہ محمد اسحاق ڈار ، وزیراعظم نا سلاہکار خارجہ سرتاج عزیز ،خصوصی کمکار طارق فاطمی ، قومی سلامتی ناسلاہکار لیفٹیننٹ جنرل (ر) ناصر خان جنجوعہ و ایلو سینئر کمامدارآک ہم ساڑی ئسر۔