پاکستان مسلم لیگ (ن) نا حکومت 19 سال آن پد ملک اٹی خانہ و مردم شماری کرفنگ نا فیصلہ کرے، شفافیت ئِ المی جوڑ کننگ کن خانہ ومردم شماری فوج انا چاروکی ٹی کرفنگ نا فیصلہ کننگا
اسلام آباد۔ 16 اپریل (اے پی پی) بنجائی وزیر خزانہ سینیٹر محمد اسحاق ڈار پارینے کہ پاکستان مسلم لیگ (ن) نا حکومت 19 سال آن پد ملک اٹی مردم و خانہ شماری کرفنگ نا فیصلہ کرے ہراڑآ چندی اعتراض آتے کننگا ہرافتا تدارک کن اسیجائی مفادات کونسل ئِ نیام تموئی تما تانکہ خانہ و مردم شماری نا عمل نا شفافیت ئِ المی جوڑ کننگ مرے۔ جمعہ نا دے عمل اٹی شفافیت ئِ المی جوڑ کننگ کن حکومت فیصلہ کرے کہ دا کاریم فوج انا چاروکی ٹی کرفنگک۔ اوپارے کہ 2016ءٹی آپریشن ضرب عضب نا سوب آن دا عمل اٹی ہرے مس انتئے کہ درکار کچ اٹی سلہہ بند فوج انا کارندہ غاک دستیاب ہلورہ وخت اس کہ مردم شماری کن سویلین افرادی واک تیار ئس۔ اوپارے کہ مردم شماری ئِ مرحلہ وار کرفنگ نا فیصلہ کننگا تانکہ درکار کچ اٹی سلہہ بند فوج انا کارندہ غاک دستیاب مننگ کیر۔ اوپارے کہ اولیکو فیز 15اپریل آ پورو کننگانے ہنداوڑ ارٹ میکو مرحلہ ہم طے شدہ پروگرام نا رداٹ سرسہبی اٹ پورو کننگک۔ وزیر خزانہ پارے کہ 25 مئی اسکان مردم و خانہ شماری نا ارٹ میکومرحلہ نا کاریم ہم پورو کننگک۔ اوپارے کہ آخبت نا ڈٹ بندی کن مردم و خانہ شماری بنداوی اہمیت تخک۔اوپارے کہ قوم نا دعاتیان مردم و خانہ شماری نا ارٹ میکو مرحلہ نا کاریم ہم پورو کننگک۔ وزیر خزانہ دا بابت آن ہر چار آ صوبہ غاتا وزیراعلیٰ، صوبائی سروک، ضلعی انتظامیہ و مردم شماری نا عمل اٹی اوار سویلین افرادی واک و سلہہ بند فوج انا کارندہ غاتا کارکڑد نا ستائِ کرے۔ وزیر خزانہ مردم شماری نا اولیکو مرحلہ ٹی شہید مروک آ سول و سلہہ بند فوج انا کارندہ غاتا قربانی تے خراج تحسین پیش کرے۔ اوپارے کہ مچ آ قوم شہید مروک آ کارندہ غاتے خراج عقیدت پیش کیک ہراک قومی فرض انا ادائیگی ٹی تینا جان تے ندر کرسا شہیدی نا ہند اس دوئی کریر۔ پریس کانفرنس آن تران کرسا ادارہ برائے شماریات نا چیف شماریات آصف باجوہ پارے کہ مردم و خانہ شماری نا ارٹ میکو مرحلہ 25اپریل آن بناءکرسا 25مئی آ چٹک۔ اوپارے کہ 15مارچ آن بناءکروک آ اولیکو مرحلہ سرسہبی اٹ پورو کننگانے و داٹی مسہ دے خانہ شماری، دہ دے مردم شماری و اوکان پد اسہ دے آرام و اِرادے ریکارڈ جمع کرفنگ کن جتا کننگاسر۔ اوپارے کہ مردم و خانہ شماری کروک آ ٹیم تیٹی سول ادارہ غاتا کارندہ غاتون اوار اوار کانود نافذ کروک آ ادارہ و سلہہ بند فوج انا کارندہ غاک فرض سرانجام تسر۔ اوپارے کہ مردم شماری نا اولیکو مرحلہ نا بناء15مارچ آ کننگاسس و ہر چار آصوبائی دارالحکومت آتیٹی دا عمل نا بناءکننگا وخت اس کہ اسلام آباد اٹی بناءداسوب آن مننگ کتو انتئے کہ دا ضلع ایلو مرحلہ ٹی اوار ئس۔ اوپارے کہ مردم شماری کن جتا بجٹ آ ہم سوج چست کننگا وخت اس کہ بجٹ نا تیاری بے کچ احتیاط اٹ کننگاسس تانکہ مالی گرج آتے پورو کننگ مرے۔آصف باجوہ پارے کہ اولیکو مرحلہ ٹی ملک انا 63 ضلع غاتیٹی کاریم ئِ پورو کننگانے ہراٹی غٹ صوبائی دارالحکومت آک ہم اوار ئُ و کم و ود ملک انا نیمہ آبادی نا حساب وکتاب دوئی کننگانے ہرافتا ریکارڈ ادارہ شماریات پاکستان آ سرمسنے۔ ہنداوڑ مردم و خانہ شماری نا ارٹ میکو مرحلہ نا کاریم ہم طے شدہ نظام الاوقات نا رداٹ پورو کننگک۔
