امن و شونہالی نا راز غٹ پاکستانی تا سیوت اٹی تخوک ئِ ، مسیحی برادری نا شونداری و شونہالی ٹی کلیدی کڑد ادا کننگ ئِ ، ملک انا رکھ ،سلامتی ، شونداری و شونہالی کن مسیحی برادری نا کوشست آک قابل قدر ئُ
اسلام آباد۔ 16اپریل (اے پی پی) وزیراعظم محمد نواز شریف مسیحی برادری تون اوار ملک اٹی رہینگوک ایلو غٹ اقلیت آتے باوری ترفینے کہ پاکستان اوفتا وطن ئِ۔ اوداہیت آ زور شاغا کہ غٹ پاکستانی تا سیوت اٹی ملک انا امن و شونہالی ناراز تخوک ئِ۔ ایسٹر نا بابت مسیحی برادری نا پن آ تینا خصوصی کلہو اٹی وزیراعظم محمدنواز شریف پارے کہ ننا اخلاقی و قومی زمواری ئِ کہ مسیحی برادری نا ہر باسک تون اوار ایلو اقلیت آتا ہر بندغ نا حق انا رکھ ئِ کننگے۔ اوپارے کہ پاکستان نا غٹ شاری تے آئین نا رداٹ بیربری حق دوئی ئِ۔ وزیراعظم ایسٹر نامذہبی تہوار نا وخت آ مسیحی ایلم تے دلی مبارکبادی تس وپارے کہ ای پاکستان اٹی رہینگوک غٹ مسیحی ایلم و ایڑ تا ایسٹر نا خوشی ٹی بریبر نا شریک اُٹ۔ وزیراعظم ہاﺅس آن جاری بیان نا رداٹ وزیراعظم مستی پارے کہ پاکستان نا مسیحی برادری ملک انا شونداری و شونہالی ٹی کلیدی کڑد ادا کننگ ئُ ۔ اوپارے کہ ملک انا رکھ ،سلامتی ،شونداری و شونہالی کن اوفتا کوشت آک قدر انا قابل ئُ۔
