اسلام آباد۔ 16اپریل (اے پی پی) بلوچستان اٹی مسہ دے ئی انسداد پولیو مہم (اینو) دوشنبے نا دے آن بناءکیک۔ نجی ٹی وی چینل نا رداٹ بلوچستان اٹی کوئٹہ تون اوار مسہ ضلع پولیو نا وائرس نا ساڑی گری نا سوب آن ہائی رسک علاقہ غاتیٹی اوار ئُ ولے بلوچستان اٹی اینخو سال ہچ ئُ پولیو کیس اس مون آ بتنے۔ ارٹ میکو کنڈ اقوام متحدہ نا ذیلی ادارہ یونیسیف نا ڈاکٹر عزیز میڈیا تون ہیت وگپ کرسا پارے کہ کوئٹہ ، قلعہ عبداللہ و پشین اٹی پولیو وائرس نا نمونہ ساڑی ئِ ہنداخاطران اینو 17اپریل آن بناءکروک آ انسداد پولیو مہم اٹی 4 آن 23توانا چناتے پولیونا پڑی تتون ویکسین نا انجکشن ہم خلنگک۔ اوپارے کہ کوئٹہ ٹی رکھی ٹیکہ غاتیان پورووڑاٹ قوت مدافعت شدہ چناتا کچ بیرہ 28 درسد ئِ ہنداوڑ قلعہ عبداللہ ٹی 27 درسد و بلوچستان اٹی غٹ آن زیات مکران ڈویژن ناعلاقہ کیچ و گوادر اٹی 50 درسد اسکان چناک رکھی ٹیکہ غاتیان قوت مدافعت شدہ ئُ۔ صوبہ ٹی داوخت آ ریفیوزل کیس انا کچ 2 ہزار 5 سد ئِ ہرافتے ٹی قلعہ عبداللہ نا کچ غٹ آن زیات ئِ کوئٹہ ٹی 130 ناخڑک ریفیوزل کیس ئُ، وخت اس کہ 250 نا خڑک چناتے طبی سوب و چندی ناجوڑی لاحق مننگ نا سوب آن پڑی کنفنگ مفک ، وخت اس کہ مستین نا نسبت ریفیوزل کیس آتا کچ اٹی صفائُ کمتی اس بسنے۔
