اسلام آباد۔ 04 فروری (اے پی پی) چیئرمین سینیٹ محمد صادق سنجرانی پارینے کہ کشمیر نا ویل انا سفائی اٹ ایسری کن ملکی و جہانی کہول آ گچین لائحہ عمل اس اختیار کرسا گام گیج ہلنگ آن گچینی ممکن مننگ کیک، پاکستان نا الس و ادارہ غاک کشمیری تا جہد آجوئی اٹ اوفتے تون ہم کوپہ سلوک ءُ و اوفتا آجوئی نا دوئی کننگ اسکان ہروڑنا قربانی تننگک۔ داخیال آتا درشانی ءِ او یوم یکجہتی کشمیر نا وخت آ تینا کلہو اٹی کرے۔ چیئرمین سینیٹ پارے کہ 5 فروری نا دے کشمیری تا جہد آجوئی و بے مٹ قربانی تا دے ءِ ہرادے ملک اٹی پبی وڑاٹ اڈتننگک دادے کشمیری تتون پورو یکجہتی نادے ءِ۔ کشمیر نا ویل انا ایسری کن پاکستان نا غٹ سیاسی جماعت آک ، ادارہ غاک و مچ آ قوم یک زبان ءُ۔ کشمیر نا ویل اناایسر اقوام متحدہ نا قرارداد و کشمیری الس نا است خواہی تا رداٹ مریک۔ دامسخت نا دوئی کننگ کن اقوام عالم و خاص وڑاٹ اقوام متحدہ نا انسانی حق انا تنظیم تے تینا کڑد ءِ ادا کروئی مریک۔ چیئرمین سینیٹ پارے کہ انتہاپسند بھارتی وزیراعظم نریندر مودی 5 اگست 2019 آ مقبوضہ کشمیر نا خصوصی حیثیت اٹ بدلی کرسا انسانی حق انا پامالی تا بدترین مثال اس قائم کرسا لکھ آ کشمیری تے اوفتا بنداوی حق آن محروم و نظربند کرینے۔ انتہاپسند بھارتی حکومت مقبوضہ کشمیر اٹی ہندوتا نوآبادکاری نا سازش ءِ مون آ دننگ ءِ تانکہ مقبوضہ کشمیر اٹی مسلم گیشتری ءِ اقلیت اٹ بدل کننگ مرے۔ صادق سنجرانی پارے کہ کشمیر اٹی ودوک آ بھارتی بربریت، ظلم و بیدادی وانسانی حق انا بدترین پامالی تیان نئے بیرہ بھارت نا مکروہ چہرہ مچ آ دنیا ٹی پاش مسنے بلکن اونا غیرکانودی گام گیج آتیا توار بڑز مننگ ءِ۔ بھارت نا ساڑی حکومت نئے بیرہ کشمیری تیا ظلم وستم کننگ ءِ بلکن بھارت اٹ رہینگوک آ غٹ اقلیت آتا زند ءِ ژند کرینے۔ داسہ وخت بسنے کہ اقوام متحدہ نا انسانی حق انا ادارہ، تنظیم و جمہوریت پسند ملک آک کشمیر نا ویل ءِ اقوام متحدہ نا قرارداد و کشمیری تا است خواہی نا رداٹ ایسر کرفنگ کن گام گیج کیر۔
