اسلام آباد۔14مئی (اے پی پی): مزن وزیر محمد شہباز شریف ءَ پاکستان ءِ وت واجہی ءُ دمگی یکوئی ءِ ہر قیمت ءَ دیمپان کنگ ءِ وھد ءَ جنوبی ایشیا ءَ ایمنی ءِ دیمروئی ءِ واستہ وتی مھکمیں جزم ءِ پدر کنگ ءَ زور پر دات ، اقوام متحدہ ءِ منوگری آنی رد ءَ کشمیر ءِ جیڈھ ءِ گیواری ءَ چہ جنوبی ایشیا ءِ تہا دائمی ایمنی دل یکیمی جوڑ بیت۔ مزن وزیر کارگس ءِ میڈیا ونگ ءِ نیمگ ءَ جاڑی بوتگیں بیان ءِ رد ءَ چار شمبے ءِ روچ ءَ مزن وزیر محمد شہباز شریف ءُ اقوام متحدہ ءِ سیکرٹری جنرل انتونیو گوتریس ءِ نیام ءَ ٹیلی فون گپ ءُ تران بوتگ ایشی ءِ تہ ءَ جنوبی ایشیا ءِ جاور ھال آنی سر ءَ گپ ءُ تران بوتگ۔ اے گوستگیں دو ہفتگ ءِ تہا دوئیں رہشونانی نیام ءَ سیمی ٹیلی فون بوتگ۔ مزن وزیر ءَ جنوبی ایشیا ءِ کش ءُ گوری جاور ھال آناں ھلاس کنگ ءِ واستہ سیکرٹری جنرل ءِ سروکی ءُ سفارتی کوشست آناں ساڑات۔ آئی ءَ گوشت کہ سیکرٹری جنرل ءِ سفارتکاری ءُ آؤٹ ریچ اقوام متحدہ ءِ منشور ءِ اصول ءُ مول ءُ مراد آنی برجائی ءِ واستہ آئی ءِ دلچسپی ءِ درشان اِنت ءُ ھمے رنگ ءَ جنوبی ایشیا ءَ ایمنی ءِ واستہ ھم۔ مزن وزیر ءَ گوشت کہ پاکستان ءَ پڑ ءَ ایمنی ءِ گیشیں نپ ءِ واستہ جنگ بندی ءِ سر ءَ تپاک کتگ ۔ مزن وزیر ءَ ہر قیمت ءَ پاکستان ءِ وت واجہی ءُ دمگی یکوئی ءِ رکھینگ ءِ وھد ءَ جنوبی ایشیا ءَ ایمنی ءِ دیمروئی ءِ واستہ وتی مھکمیں جزم ءِ پدا زور دات۔ مزن وزیر ءَ بھارت ءِ نیمگ ءَ ناشرکاری ءُ زوراکی ءِ دروگیں الزام آناں مذمت کنان ءَ ایشی ءَ را ھترناکیں مثال لیک اتگ ءُ گوشت کہ میاں اوستمانی براتی ایشی ءِ سر ءَ جوانیں نوٹس بہ زوریت۔ آئی ءَ بھارتی سروکی ءِ نیمگ ءَ چہ برجاھیں اشتعال انگیز بیان آنی سر ءَ ھم جیڈھ ءِ درشانی کتگ کہ ایشی ءَ چہ دمگی ایمنی ءِ واستہ ھترہ ءِ دیم ءَ کیت۔ آئی ءَ اے گپ ءِ سر ءَ زور پر دات کہ اقوام متحدہ ءِ سلامتی کونسل ءِ قرارداد آنی رد ءَ جموں ءُ کشمیر جیڈھ ءِ انصاف ءِ گیواری جنوبی ایشیا ءَ دائمی ایمنی ءَ را دل یکیمی کنگ ءِ واستہ المی اِنت ءُ سیکرٹری جنرل ءَ را زور پر دات کہ آ ایشی ءِ انصاف ءِ گیواری ءَ وتی کرد ءَ پیلو بہ کنت۔ سیکرٹری جنرل ءَ جنگ بندی ءَ را وش اتک کنان ءَ شہری جانی جان ءِ پشدر ءَ دلپدردی ءِ درشانی کت۔ آئی ءَ دمگی ایمنی ءُ ایمنی ءَ را دیم ءَ برگ ءِ واستہ دوئیں نیمگ آنی گوما ھوار بوھگ ءَ را برجاہ دارگ ءِ جزم ءِ درشان کت۔ آئی ءَ گوشت کہ میاں اوستمانی ایمنی ءِ دیمروئی ءِ واستہ کار کنگ آئی ءِ فرض انت، ایشی ءَ را دگنیا ءَ را ضلورت انت۔
