اسلام آباد۔ 15اپریل (اے پی پی) محکمہ موسمیات نا رداٹ (اینو) یک شنبے آن سے شنبے اسکان ملک انا گیشتر میدانی علاقہ غاتیٹی بھاز باسنی مننگ نا گمان ئِ وخت اس کہ بروک آ 24گھنٹہ ٹی ملک انا گیشتر علاقہ غاتیٹی موسم باسن و بارُن سلک ولے نصیر آباد، مکران، سبی ، سکھر، شہید بے نظیر آباد، لاڑکانہ، حیدرآباد، ملتان ، بہاولپور، ساہیوال ، ڈی جی خان و ڈی آئی خان ڈویژن بھاز باسنی نا پلویڑ اٹی مریرہ۔ رپورٹ نا رداٹ گدرینگوک آ 24 گھنٹہ ٹی ملک انا گیشتر علاقہ غاتیٹی موسم باسن و بارُن وخت اس کہ سندھ ، سویلی پنجاب و سویلی بلوچستان اٹی موسم بھاز باسن و بارُن سلک۔ ہفتہ نا دے ریکارڈ کروک آ باسن انگا ہند آتا درجہ حرارت نا رپورٹ نا رداٹ جیکب آباد، لاڑکانہ و تربت اٹی درجہ حرارت 47 ڈگری سینٹی گریڈ، دادو، شہید بے نظیر آباد، مٹھی ، چھور، سکھر، پڈعیدن، موہنجودڑو، لسبیلا، سبی ٹی 46 ، بہاولپور، بھکر ، رحیم یار خان و سکرنڈ اٹی 45 ڈگری سینٹی گریڈ ریکارڈ کننگا۔
