اسلام آباد۔ 15 اپریل (اے پی پی) پاکستان بزنس مین اینڈ انٹلیکچو لز فورم نا صدر میاں زاہد حسین پارینے کہ مچ آ ملک انا کاروباری برادری اُرائی و صنعتی گیس کنکشن آتیا خلوک پابندی ئِ ہرفنگ نا وزیراعظم محمد نواز شریف نا فیصلہ نا پبی تائید ئِ کیک۔ داڑآن الس و کاروباری برادری نا ویل آتیٹی کمتی بریک وخت اس کہ معیشت نا چندی بشخ بشمول یوریا، ٹیکسٹائل، پاور سیکٹر ، جنر ل انڈسٹری و سی این جی نا بشخ آتیا ہم مثبت زئم تمک۔ میاں زاہد حسین تینا اسہ بیان اسے ٹی پارے کہ ساڑی حکومت گیس انا کمتی تون مون تننگ کن ایران و ترکمانستان آن گیس انا درآمد اٹی بروک اڑاند آتے مر کننگ کن چندی اہم ئُ گام گیج کرے و قطر آن ایل این جی نا درآمد نا معاہدہ ئِ ہم کرے تانکہ معاشی شونداری ئِ المی جوڑ کننگ مرے۔ داوخت ملک اٹی اسہ ایل این جی ٹرمینل اس کاریم کننگ ئِ ہرانا کچ 600 ملین معکب فٹ ہردے ئی ئِ۔ مسہ تو انا تہٹی ارٹ میکو ٹرمینل ہم کاریم نا بنائِ کیک ہراڑآن درآمد مروک آ گیس انا کچ دگنا مریک وگیس انا تنکی ٹی خاطر خواہ کمتی بریک ہراڑآن جم اٹنگا حالیت آک پین جوان مریرہ۔
