اسلام آباد۔ 14اپریل (اے پی پی) وزیراعظم نا خصوصی کمکار امور خارجہ سید طارق فاطمی پارینے کہ پاکستان ایلو ملک آتا معاملہ غاتیٹی نیام تمپننگ نا پالیسی آ عمل کننگ اٹی ئِ، بھارت آن کشمیر تون اوار غٹ معاملہ غاتا ایسری کن بامسخت و غیر مشروط مذاکرات خواہک، وزیراعظم محمد نواز شریف ہر اہم انگا جہانی فورم آ کشمیر نا ویل ئِ پبی وڑاٹ تالان کننگ ئِ تانکہ کشمیری تے اوفتا بنداوی حق حق خودارادیت ملنگ کے۔ چین پاکستان اٹی زرکاری تون اوار چندی بشخ آتیٹی پاکستان نا راہشونی ئِ ہم کننگ ئِ ہراڑآن بروک آ منہ سال اٹی داڑے صفا ئُ بدلی اس نظر بریک و ملک پین شون ہلیک۔ داخیال آتا درشانی ئِ او اسہ نجی ٹی وی چینل اسے تون ہیت وگپ کرسا کرے۔ اوپارے کہ پاکستان تو مستین اٹی ہم تینا گڑتی تا درشانی ئِ کرسا کرینے کہ بھارت پاکستان اٹی دہشت گردی و افراتفری تون اوار تخریبی کارروائی تیٹی اوار مسنے وخت اس کہ دہشت گد آتون ہم بھارتی رابطہ ئس ہرانا ننتون صفائُ شاہدی ہم ساڑی ارے۔ بھارتی جاسوس کلبھوشن یادیو نا داکان ہلنگ انگ و اونا بھارتی نیوی ٹی حاضر ڈیوٹی مننگ تون اوار اوار تینا ڈوہ انا اعتراف ئِ کننگ مکروہ دروشم ئِ بے نقاب کننگ کن بھاز ئُ۔
