اسلام آباد۔ 14اپریل (اے پی پی) سلاہکار خارجہ سرتاج عزیز کلبھوشن یادیو نا سزا نا بابت بھارت نا بے بنداو دوبہ غاتا مذمت ئِ کرسا پارینے کہ نئی دہلی زمواری نا مظاہرہ ئِ کرسا دُن ئُ بیان جاری کننگ آن پاناد کے ہراڑآن ہڑتوم آ ملک آتا الس نا نیام اٹ دشمنی پین زیات مرے۔ پاک بھارت تعلقداری تیٹی ودوک آ تنکی نا چٹفنگ کن فعال سفارت کاری نا گرج ئِ ۔ بھارتی جاسوس کلبھوشن یادیو نا برخلاف ملکی کانود نا رداٹ پورو شفاف وڑاٹ مقدمہ ئِ چلیفنگا، اودے پورو کانودی کمک فراوان کننگا۔ کلبھوشن یادیو پاکستان نا سالمیت ئِ نسخان تننگ و تخریبی سرجز آتیٹی اوار مس۔ اودے ٹھوس و معتبر شاہدی تا بنداو آ سزا بنفنگانے۔ بھارتی جاسوس ئِ سزا تننگ آ غٹ سیاسی جماعت آک متفق ئُ و پاکستان ئِ مون تروک سیکورٹی خلیس آتا برخلاف مچ آ قوم یکجائِ۔ جمعہ نا دے سلاہکار خارجہ پریس کانفرنس آن تران کرسا فوجی عدالت نا کنڈآن کلبھوشن یادیو ئِ سزائے موت نا فیصلہ آن پد بھارت نا بے بنداو دوبہ غاتا مذمت ئِ کرے و پارے کہ کلبھوشن یادیو نا برخلاف مقدمہ ٹی غٹ کانودی گرج آتے پورو کننگا۔ مقدمہ پورو شفاف وڑاٹ چلیفنگا و اودے کانودی کمک فراوان کننگا۔ کلبھوشن یادیو ئِ پاکستان اٹی جاسوسی و تخریبی سرجز آتیٹی اوار مننگ نا بابت معتبر و ٹھوس شاہدی تا بنداو آ سزائے موت بنفنگانے۔
