کوئٹہ۔ 14اپریل (اے پی پی) وزیراعلیٰ بلوچستان نواب ثناءاللہ زہری پارینے کہ برمتہ مروک سیکرٹری عبداللہ جان نا بازیابی کن پبی کوشست جاری ئِ ۔ پنجاب یونیورسٹی لاہور اٹی پشتون طالب علم آتیابیدادی واقعہ نا ہم جاچ ئِ ہلنگ اُن، کمیٹی وزیراعلیٰ پنجاب تون اوار ایلو کمامدار آتون اوڑدہی کرسا دا اہم انگا ویل ئِ ایسر کیک۔ ننا طالب علم آک پنجاب یونیورسٹی ٹی تینا تعلیم ئِ پورو کیرہ۔ داخیال آتا درشانی ئِ او جمعہ نا دے بلوچستان اسمبلی نا دیوان اٹی خیال آتا درشانی ئِ کرسا کرے۔ بلوچستان اسمبلی نا دیوان اسپیکر راحیلہ حمید خان درانی نا کماشی ٹی مس ۔ دیوان اٹی بلوچستان اٹی جعلی شناختی کارڈ ڈومیسائل و لوکل سرٹیفکیٹس نا جاری کننگ نا معاملہ غا شرہ مس۔ وزیر داخلہ بلوچستان میر سرفراز بگٹی ایوان ئِ پارے کہ سوبہ ٹی بھلو کچ اسے ٹی درملکی تے شناختی کارڈ جاری کننگا۔ ایلو صوبہ غاتا خلقت ئِ لوکل سرٹیفکیٹس و ڈومیسائل جاری کننگا۔ پوائنٹ آف آرڈر نا ٹک آتا ورندی ئِ ترسا قائد ایوان نواب ثناءاللہ زہری پارے کہ برمتہ مروک سیکرٹری عبداللہ جان نا بازیابی کن پبی کوشست جاری ئِ۔ پنجاب یونیورسٹی لاہور اٹی پشتون طالب علم آتیا بیدادی نا واقعہ نا ہم جاچ ئِ ہلنگ اُن۔ صوبائی وزیر عبدالرحیم زیارتوال ، سردار عبدالرحمان کھیتران و مجیب الرحمان محمد حسنی ئِ باوری ترفے کہ اوفتا علاقہ غاتیٹی جاری محکمیہ تعلیم نا کاریم تینا تخوک آ وخت آ پورو کننگک۔ ہراڑآ اسپیکر اسمبلی دیوان ئِ 17 اپریل اسکان ملتوی کرے۔
