جیکب آباد۔ 14اپریل (اے پی پی) وزیراعظم محمد نواز شریف جیکب آباد نا الس نا شرحالی کن 100 کروڑ روپئی نا شونداری فنڈ، جدید وومن ووکیشنل ٹریننگ سینٹر، نواحی خلق آتے کن بجلی و گیس انا فراوانی، پاسکو سینٹر نا اڈ تننگ و قومی جان جوڑی کارڈ اتون اوار چندی ڈٹ آتیا تالان جامع پیکج اسے نا پڑو ئِ کرسا پارینے کہ وخت بدلینگ انگ ئِ ،حالیت آک بدلینگرہ، داسہ بیرہ نعرہ غاتیا وونٹ ملیپک، گڑاس کننگ آن وونٹ ملک، ہراشونداری اسلام آباد، پنجاب و بلوچستان اٹی مننگ ئِ او سندھ و کے پی کے ٹی ہم بایدے مرے۔ داخیال آتا درشانی ئِ او جمعہ نا دے داڑے اسہ بھلو السی مچی اسے آن تران کرسا کرے۔ دود اٹی بنجائی وزیر ریلوے خواجہ سعد رفیق، وزیراعظم نا خصوصی کمکار سیاسی امور ڈاکٹر آصف کرمانی ، مسکوہی اسپیکر قومی اسمبلی الٰہی بخش سومرو ، سینیٹر راحیلہ مگسی، صدر پاکستان مسلم لیگ (ن) سندھ بابو سرفراز، مسلم لیگ (ن) نا ہندی راہشون اسلم ابڑو و سجادعلی ئسک ہم ساڑی ئسر ۔وزیراعظم پارے کہ کنا نظر اٹی پاکستان اٹی غٹ آن زیات حقدار خلقت جیکب آباد نا خلقت ئِ، اگہ پاکستان اٹی شون ہلوک ضلع یا شار اسے 100 کروڑ روپئی تننگے تو جیکب آباد ئِ 200 کروڑ روپئی بایدے تننگے۔ اگہ اسلام آباد ئِ 200 کروڑ روپئی تننگے تو جیکب آباد ئِ 400 کروڑ بایدے تننگے، دا اوفتا حق ئِ۔ جیکب آباد نا رہینگوک آک ہم انداخہ ہی باعزت ، ہموخہ ہی بایدے شونہال مریر اخس کہ اسلام آباد، لاہور ، کراچی و کوئٹہ نا رہینگوک آک ئُ۔ وزیراعظم پارے کہ ترند انگا باسنی نا سوب بھلو کچ اسے ٹی خلقت نا السی مچی ٹی ساڑی مننگ نا ستائِ کرسا پارے کہ خاص کر نیاڑی تا بھلو کچ اسے ٹی ساڑی مننگ ستاءکڑزک۔
