اسلام آباد۔ 14 جنوری (اے پی پی) وزیراعظم عمران خان اولیکو قومی سلامتی پالیسی نا السی ورژن نا بناءِ کرے، دا بابت جمعہ نادے آ وزیراعظم آفس اٹی اسہ دود اس مس۔ دود اٹی بنجائی وزیرآک، قومی سلامتی نا سلاہکار، پارلیمنٹ نا باسک آک، چیئرمین جوائنٹ چیفس آف اسٹاف کمیٹی، غٹ سروسز چیفس، سینئر سول و فوجی کمامدارآک، ماہرین، تھنک ٹینکس، میڈیا و سول سوسائٹی آن تعلق تخوک آ بندغ آک بشخ ہلکر۔ وزیراعظم عمران خان تینا اہم تران اٹی تینا حکومت نا قومی سلامتی پالیسی نا ٹہیفنگ نا سرسہب گام ءِ تالان کرے۔ وزیراعظم عمران خان پارے کہ قومی سلامتی پالیسی اونا حکومت نا اولیت ئسک، وزیراعظم داہدف ءِ دوئی کننگ آ قومی سلامتی نا سلاہکار و اونا ٹیم ءِ مبارکبادی تس۔ اوپالیسی آ سرسہب عملدرآمد نا اہمیت ءِ تالان کرے و پڑو کرے کہ قومی سلامتی کمیٹی باقاعدگی اٹ داڑآ پیش رفت نا جاچ ءِ ہلیک۔ وزیراعظم پیدوار کرے کہ قومی سلامتی پالیسی 2022-2026نا محور حکومت نا ورژن ءِ ہرا یخین تخک کہ ملکی سلامتی نا سیبو شاری تا سلامتی ٹی ءِ، ہروڑنا قومی سلامتی پالیسی ٹی قومی ہم آہنگی و مخلوق نا شونہالی ءِ بایدے اوار کننگے وخت اس کہ بے پرخ بنداوی حق و راجی انصاف نا ضمانت مرے۔ اوپارے کہ تینا شاری تا گیشتر لائخی تیان فائدہ ہرفنگ کن خذمت آتیا مبنی گچین نظم و نسق ءِ مون آ دننگ المی ءِ۔ وزیراعظم پارے کہ ننا سلہہ بند فوج ، ننا گمر ءِ۔ ڈیہہ ٹی ننے مون تروک خطرہ و ہائبرڈوار انا ودوک آ چیلنج آتا رداٹ اودے نننا کنڈآن بھاز اہمیت و مخ تفی دوئی مریک۔ وزیراعظم پارے کہ ننا خارجہ پالیسی نا بھلا مسخت ڈیہہ و ڈیہہ آن پیشن امن و سوگوی مریک، ننا خارجہ پالیسی ٹی برجازرگزرانی خارجہ پالیسی آ پین چکار کننگک۔ قومی سلامتی نا سلاہکار ڈاکٹر معید یوسف گپ وتران کرسا پارے قومی سلامتی پالیسی نا ورژن سرجمی اٹ بیان کرے۔ اوپدریسہ کمکاری آ وزیراعظم عمران خان و غٹ کمامدارآتا منت واری ءِ ہرفے۔ اوپارے کہ قومی سلامتی پالیسی ننا سلامتی آ اثرانداز مروک آ روایتی و غیر روایتی ویل آتا گیشتر رداٹ ٹہیفنگانے۔ قومی سلامتی پالیسی ٹی زرگزرانی سلامتی، جیوسٹریٹجک و جیوپولیٹیکل پلوآتا محور ءِ ہراٹی پاکستان نا سلامتی نا سوگو و دنیا ٹی ہند اس دوئی کننگ نمان خصوصیت آک ءُ۔ اوپارے کہ دا دستاویز ءِ پورو سول ملٹری اتفاق رائے آن پد گڈیکو دروشم اس تننگانے۔
