اسلام آباد۔ 14 جنوری (اے پی پی) وزیراعظم عمران خان پارینے کہ ننا قومی سلامتی پالیسی کثیرالجہتی ءِ، امنائی دستاویز نا جوڑ کننگ اٹ مون تروک چیلنج آتے مون آ تخنگانے، قومی سلامتی کن ہمہ جہت شونداری المی ءِ، کانود نا حکمرانی آن بیدس اسہ ملک اس ہم شونہال مننگ کپک، ننا کوشست زرگزران نا سوگوی و راج انا شیفکو تپہ غاتے بڑز ہرفنگ ءِ۔ او جمعہ نادے آ داڑے وزیراعظم آفس اٹ نیشنل سیکورٹی پالیسی نا پبلک ورژن نا بناءِ کننگ نا وخت آ اڈہلوک آ دود آن تران کریکہ۔ دود آن وزیراعظم نا سلاہکار قومی سلامتی ڈاکٹر معید یوسف ہم تران کرے۔ دود اٹی اسپیکر قومی اسمبلی اسد قیصر، بنجائی کابینہ نا باسک آک، چیئرمین جوائنٹ چیفس آف اسٹاف کمیٹی، سلہہ بند فوج انا سروک ، سفارتکار و بڑزکو فوجی کمامدارآک ہم ساڑی ئسر۔ داکان مست وزیراعظم قومی سلامتی پالیسی نا تاریخی دستاویز آ دستخط ہم کرے، وزیراعظم تینا تران اٹی پارے کہ قومی سلامتی پالیسی نا جوڑ کننگ ستاکڑزوک ءُ ہیت اسے، دا پالیسی کثیر الجہتی ءِ و داامنائی دستاویز ءِ بھلو خواری اسے اٹ تیار کننگانے، قومی سلامتی نا سہی وڑٹ ستاءِ کننگا، اونا جوڑ کننگ اٹ ملک و قوم ءِ مون تروک چیلج آتے مون آ تخنگانے۔ اوپارے کہ قومی سلامتی کن ہمہ جہت شونداری المی ءِ، ہمہ جہت شونداری نا مطلب بیرہ نیزگار الس نا آخا بلکن گوجالنگوک آ و کم شون ہلوک علاقہ غاتا شونداری ہم ارے، ہنداوڑ ہر لس بندغ ریاست نا رکھ اکن اسٹیک ہولڈر جوڑ مریک، غٹ آن بھلا سیکورٹی ہمووخت آ مریک ہراتم ریاست نا رکھ اکن الس اونا پداٹ سلک۔ وزیراعظم پارے کہ قومی سلامتی پالیسی سہی کنڈانا تعین ءِ ہم کیک و قومی سلامتی و سوگوی نا دوئی کننگ کن اسہ سمت اٹ گامزن مننگ کن پوروحکومتی مشینری نا کمک کیک۔ اوپارے کہ ننا سلہہ بند فوج، ننا گمر ءِ۔ سلہہ بند فوج ءِ خراج تحسین پیش کیوہ ہرا خطرہ غاتیان پد ہم ملک ءِ رکھا، وزیراعظم دہشت گردی نا برخلاف جنگ اٹی ہم سلہہ بند فوج انا بے مٹ قربانی تا ذکر ءِ کرے و پارے کہ ڈیہہ ٹی ننے مون تروک خطرہ و ہائبرڈ وار نا ودوک آ چیلنج آتا رداٹ اودے ننا کنڈآن بھاز اہمیت و مخ تفی دوئی مریک۔ وزیراعظم پارے کہ ننا خارجہ پالیسی نا بھلامسخت ڈیہہ و ڈیہہ آن پیشن امن و سوگوی مریک، ننا خارجہ پالیسی ٹی برجا زرگزرانی خارجہ پالیسی آ پین چکار کننگک۔ وزیراعظم پارے کہ قومی سلامتی پالیسی اونا حکومت نا اولیت ئسک، وزیراعظم دا ہدف ءِ دوئی کننگ آ قومی سلامتی نا سلاہکار و اونا ٹیم ءِ مبارکبادی تس۔ اوپالیسی آ سرسہب عملدرآمد نا اہمیت ءِ تالان کرے و پڑوکرے کہ قومی سلامتی کمیٹی باقاعدگی اٹ داڑآ پیش رفت نا جاچ ءِ ہلیک۔ وزیراعظم پیدوار کرے کہ قومی سلامتی پالیسی2022-26نا محور حکومت نا وژن ءِ ہرا یخین تخک کہ ملکی سلامتی نا سیبو شاری تا سلامتی ٹی ءِ، ہرقومی سلامتی پالیسی ٹی قومی ہم آہنگی و مخلوق نا شونہالی ءِ اوار کننگے وخت اس کہ بے پرخ بنداوی حق و راجی انصاف نا ضمانت مرے۔ اوپارے کہ تینا شاری تا گیشتر لائخی تیان فائدہ ہرفنگ کن خذمت آتیا مبنی گچین نظم ونسق ءِ مون آ دننگ المی ءِ۔ اوپارے کہ بیوسی نا حالیت اٹ آئی ایم ایف آ ہنوئی تمک و اونا شڑت آتے ہم منوئی تمک۔ وزیراعظم تعلیم ، غذائی  رکھ، قومی زرگزران، چاگڑدی بدلی، کانود نا حکمرانی، بریبر شونداری، آبی رکھ اتون اوار چندی اہم بشخ آتا اہمیت ءِ تالان کرسا پارے کہ ہرملک انا تعلیمی نظام ہی قوم اس ٹہیفک، انگریز داڑے انگلش میڈیم نظام ءِ اِلا تو منہ مخلوق کن ئس، بدبختی اٹ ننا ملک اٹی مسہ نظام تعلیم مون آ ہِننگ ءُ ہرافتے ٹی انگریزی میڈیم، اردو و مدرسہ غاتا متوازی نظام اوار ءِ ہرانا راج آ منفی زہم مرتب مننگ ءِ، پیسہ والاک انگریزی میڈیم ءِ گچین کننگ ءُ وخت اس کہ غٹ آن محروم تپہ مدرسہ غاتیٹی خواننگ ءُ۔ ہشت لکھ چناانگلش میڈیم سسٹم نا بشخ ءُ وخت اس کہ 25 آن 26 لکھ مدرسہ غاتیٹی خواننگ ءُ۔ ایلو آبادی کن اردو میڈیم ءِ۔ نن اولیکو وار پنچ اسکان اسہ وڑ قومی نصاب ءِ بھلو مشکل اسے ٹی جوڑ کرینن ہرادے ریسہ وار بروک آ کلاس آتسکان دینہ۔ وزیراعظم پارے کہ دنیا نا اسہ ملک اس ہم کانود نا حکمرانی آن بیدس شونہال مننگ کپک۔ نیزگار ملک آک داخاطرآن نیزگار افس کہ اوفتےتون وسیلہ نا کمتی ءِ بلکن ہموڑے کانود نا حکمرانی اف۔ شونہال و نیزگار راج اٹ بنداوی پرخ ہم ہندادے۔ مدینہ نا ریاست نا حکمران کانود نا حکمرانی نا سوب آن دنیا نا حکمران مس۔ ہموڑے ہزگار و نیزگار کن جتا جتا کانود اَلوکہ۔ اوپارے کہ سوئٹزر لینڈ نا رقبہ ننا قطبی علاقہ غاتیان ہم کم مننگ آن پد ہم او بیرہ سیل و سوات آن 60 ارب ڈالر کٹک ہرانا بنداوی سوب ہموڑے کانود نا حکمرانی و ادارہ غاتا سوگوی ءِ۔ وزیراعظم پارے کہ ننا جہد دادے کہ ملک اٹ کانود نا حکمرانی مرے، کانود نا حکمرانی مفننگ نا سوب آن ملک اٹی کارٹل جوڑ مس۔ مسابقتی کمیشن تون اوار ہر ریگولیٹر نا کاریم السی فائدہ غاتا رکھ و ادارہ سے نا ادارہ جاری ءِ توننگ ءِ۔ مستین اٹ بدبختی اٹ پاکستان ءِ زرگزرانی وڑاٹ سوگو کننگ نا کوشست کننگتو۔ داملک 22 کروڑ الس نا ءِ ہرانا گیشتری آبادی ورناتیا تالان ءِ۔ داڑے دنیا نا غٹ بھلا کمپنیک زرکاری کن بریر۔اوپارے کہ پاکستان نا برآمد آتے ودفنگ کن مستین اٹ ہچ ءُ چکار اس کننگتو۔ اگہ نن پاکستان نا برآمد آتے ودفپنہ تو ننتون دولت امر بریک، ملک امر شون ہلیک، داڑآ نن سٹڈی کرین تو معلوم مس کہ ملکی ادارہ غاتے پیشن نا زرکار و برآمد آتا بابت ہچ ءُ دلچسپی اس اف بلکن اوفتا کسر اٹ اڑاند کننگا۔ وزیراعظم پارے کہ ننتون وسیلہ غاتیان شپ ڈغار ءِ۔ نن ساحل سمندر آن پام آئل دوئی کننگ کینہ۔ آسراتی تننگ آن ننا آئی ٹی برآمد آتیٹی 70 درسد ودکی مسنے۔ بروک آ وخت ٹیکنالوجی نا ءِ۔ اوپارے کہ نیشنل سیکورٹی پالیسی  نا جوڑ کننگ اٹ چیلنج آتے مون آتخنگانے۔ پاکستان ءِ بروک آ وخت آتیٹی دیر انا بھلو چیلنج اس مون تروک مریک۔ داڑتون مون تننگ کن نن دہ پوسکن ءُ ڈیم جوڑ کننگ اُن ہرا دہ سال اٹی پورو مریرہ ہراڑآن دیر کوڑی کننگ نا کچ اٹی ودکی مریک و غذائی رکھ دوئی مریک۔ داڑتون اوار اوار چاگڑدی بدلی تے ہم پالیسی نا بشخ جوڑ کننگانے۔