چین نا صدر شی جن پنگ نا ایشیائ، افریقہ و یورپ تون اوار مچ آ دنیا نا ملک آتے گنڈنگ نا وژن ستاءکڑزک، شونداری کن نن بایدے اسہ ایلو نا خڑک برین
سی پیک کون آ میگا ڈٹ آتا رداٹ پاکستان اٹی بنداوی ڈھانچہ، توانائی، صنعت و واپار تون اوار ایلو بشخ آک شون ہلیرہ
اسلام آباد۔ 14اپریل (اے پی پی) وزیراعظم محمد نواز شریف پارینے کہ چین نا صدر شی جن پنگ نا ایشیائ، افریقہ و یورپ تون اوار مچ آ دنیا نا ملک آتے گنڈنگ نا وژن ستاکڑزک، شونداری کن نن بایدے اسہ ایلو نا خڑک برین، اینو نظریاتی اختلاف ئِ تہوتننگ نا وخت اف، صدر شی جنگ پنگ نا اسٹریٹجک پارٹنر شپ و اسہ ڈیہہ و اسہ سڑک نا وژن قدر نا قابل ئِ۔ داخیال آتا درشانی ئِ او جمعہ نا دے داڑے چینی صدر نا کتاب نا مون پاشی نا دود آن تران کرسا کرے۔وزیراعظم محمد نواز شریف پارے کہ کتاب نا مون پاشی ٹی شرکت کنکن شرف نا سوب ئِ ۔ اوپارے کہ صدرشی جنگ پنگ چین نا عظیم راہشون و پاکستان نا سنگت ئِ۔ اونا کتاب اٹی جہانی شونداری نا خیال آتا عکاسی مریک، چینی صدر نا کتاب نا اردو سرحال”چین نا طرز حکمرانی“ گچین کننگانے ہرا بیرہ ساڑی آ سیاست آ آخا بلکن ہڑتوم آ ملک آتا جوزہ غاتا عکاس ہم ارے و شونداری کن چین نا صدر نا جہد ئِ مون آ تخک۔ اوپارے کہ چین نا پرامن شونداری مچ آ دنیا کن اسہ مثل اسے و دا کتاب دنیا نا رابطہ غاتیٹی ودکی نا بابت چین نا تغ تے مون آ تخک۔ اوپارے کہ کتاب اٹی صدر شی جن پنگ پاکستان نا شونداری کن کروک آ گام گیج آتیاہم سرجمی اٹ روشنی شاغانے۔ وزیراعظم پارے کہ داکتاب آن ننے چین نا گدرینگوک آ 40 سال انا شاندار شونداری و گورننس نا گچینی، کانود نا حکمرانی و معاشی شونداری نا ہدف آتے دوئی کننگ کن کروک آ گام گیج آتا بارواٹی معلوم مریک۔ اوپارے کہ کتاب آن معلوم مریک کہ ہراوڑ چین جہانی کہول آ بھلو ہند اس ہلک۔ وزیراعظم پارے کہ پاکستان و چین نا سیاسی، سفارتی و دودوربیدہ ہی تعلقداریک کیہی دہائی تیان تالان و مشترک ئُ۔ اوپارے کہ کتاب اٹی بیرہ چین نا آخا بلکن مچ آ دنیا نا شونداری نا عکاسی ئِ کننگانے و دا درست ئِ کہ چین نا گورننس و شونداری نا وژن مثالی ئِ۔ وزیراعظم پارے کہ دنیا نا ایلو ملک آک ہم چین نا طرز آ شونداری ہلنگ کیرہ۔ اوپارے کہ چین مچ آ دنیا تون پرامن تعلقداری تخک و جہانی برادری نا شونداری کن چین نا کوشست آک قابل مثال ئُ۔ اوپارے کہ صدرشی جن پنگ نا کتاب چین نا ترند تر شونداری و طرز حکمرانی نا عکاس ئِ۔ چین نا پرامن شونداری نا راز آ امن ہمسائیگی نا وژن ئِ۔ اوپارے کہ پاکستان ہم علاقائی و جہانی کہول آ امن و ایمنی کن کاریم کننگ ئِ۔ وزیراعظم محمد نواز شریف پارے کہ اینو نن غٹ اواری اٹ شونداری نا کسر آ چلیگنسا نئے بیرہ ڈیہہ بلکن دنیا نا شونہالی کن کاریم کننگ کینہ و پرامن ہمسائیگی نا رداٹ تین پہ تینی پت انا کمک اٹ جھیڑہ غاتا پرامن ایسری کن زیات گچین کڑد ادا کننگ کینہ تانکہ جہانی کہول آ نیزگاری نا چٹفنگ و لس بندغ نا شونداری ئِ ممکن جوڑ کننگ مرے۔ وزیراعظم پارے کہ اینو نا دور نظریاتی اختلاف آتے تہو تننگ نا وخت اف ۔ اوپارے کہ چینی صدر شی جن پنگ نا اسٹریٹجک پارٹنر و اسہ سڑک اسہ ڈیہہ نا وژن ستاکڑزک۔ وزیراعظم پارے کہ کتاب نا اشاعت، چین نا شونداری و طرز حکمرانی نا بارواٹی دنیا ئِ معلومداری نا فراوانی آ کروک آ کوشست آک ستاءکڑزرہ۔ وزیراعظم پارے کہ اینو متکن آ سنگت آتون ملسا خوشی مسنے و پاک چائنا انسٹی ٹیوٹ نا چیئرمین سینیٹر مشاہد حسین سید، پاک چین سنگتی کن کیہی سال آتیان کاریم کننگ ئِ و بیرہ قومی مفاد نا رداٹ سی پیک نا سرسہبی کن دن و نن اختہ ئِ۔ اومشاہد حسین سید ئِ ملک انا نہادی میرات گوندا۔ وزیراعظم تینا تقریر نا ایسر اٹی پاک چین سنگتی زندہ باد نا نعرہ ئِ ہم خلک۔ دود اٹی چین نا سفیر سن وی ڈونگ، سفارتی برادری ، پارلیمنٹ نا باسک، بنجائی وزیر آتون اوار سول سوسائٹی نا باسک آک ہم بھلو کچ اسے ٹی ساڑی ئسر۔
