اسلام آباد۔ 14اپریل (اے پی پی) پاک چین انسٹی ٹیوٹ نا چیئرمین سینیٹر مشاہد حسین سید پارینے کہ چین نا طرز حکمرانی آ چینی صدر نا کتاب نا مون پاشی اسہ تاریخی ئُ موقع اسے۔ جمعہ نا دے داڑے چین نا صدر شی جن پنگ نا کتاب”چین نا طرز حکمرانی“ نا مون پاشی دود آن تران کرسا اوپارے کہ پاکستان و چین نا تعلقداریک مثالی ئُ و جہانی کہول آ اوفتا صفت ئِ کننگک۔ اوپارے کہ ہڑتوم آ ملک آک گدرینگوک آ 50سال آن زیات وخت آن تین پہ تینی تعلقداری تا مون آ دننگ کن سرگرم عمل ئُ۔ اوپارے کہ چین نا صدر نا کتاب نا مون پاشی وزیراعظم نواز شریف نا خصوصی پارت آ وزیراعظم نا دفتر اٹی اڈ تننگ انگ ئِ۔ مشاہد حسین سید پارے کہ 1983 ءٹی ہراتم وزیراعظم محمد نواز شریف ہراتم پنجاب نا وزیر خزانہ ئس تو اونا شی جن پنگ تون بطور نائب صدر چین کیہی اوڑدہی مس و ہڑتوم آ راہشون تا نیام اٹ معاشی شونداری و جہانی امن نا نظریہ غاک تین پہ تین مشترک ئُ۔ اوپارے کہ چین پاکستان اقتصادی راہداری (سی پیک) نا ڈٹ ہڑتوم آ ملک آتا سنگتی نا مثالئِ و ون روڈ بیلٹ نا صدر شی جن پنگ نا نظریہ نا عکاس ئِ۔ اوپارے کہ ون بیلٹ ون روڈ انا ڈٹ انا رداٹ متکن آ سلک روڈ انا بحالی آن دنیا نا 65 آن زیات ملک آتے اسہ ایلو ٹی گنڈنگ مریک ہراٹی براعظم ایشیائ، افریقہ و یورپ تون اوار ایلو ملک آک اوار ئُ۔ اوپارے کہ سلک روڈ انا بحالی ٹی پاکستان بنداوی اہمیت تخک و نن چین و چین انا صدر نا منت وار اُن کہ او پاکستان و اونا الس آ پت انا درشانی ئِ کرسا سی پیک نا بنائِ کرے۔ اسہ ڈیہہ و اسہ سڑک نا وژن شونداری نا وژن ئِ ہرا پاکستان نا شونداری و شونہالی ٹی اہم کڑد ادا کیک ہراڑآن پاکستان نا کم شون ہلوک علاقہ غاتا شونداری و نیزگاری نا چٹفنگ اٹی کمک رسینگک۔ مشاہد حسین پارے کہ سی پیک بیرہ پاکستان و چین نا ڈٹ آخا بلکن دا ڈیہہ و دنیا نا غٹ ملک آتا اقتصادی رابطہ غاتا مون آ دننگ کن ئِ ہراڑآن مسہ ارب آن زیات بندغ نا آبادی نا ملک آک فائدہ ہرفرہ۔ مشاہد حسین سید پارے کہ وزیراعظم محمدنواز شریف و چینی صدر شی جن پنگ شونداری و شونہالی نا اسیجائی وژن تخرہ و پاک چین سنگتی نامثل مچ آ دنیا ٹی تننگک۔ اوپارے کہ قومی شاعر علامہ اقبال ؒ اینو آن 85 سال مست پاک چین سنگتی ئِ ہمالیہ آن بڑز گونداسس۔ اوپارے کہ سی پیک نا پوروی و تین پہ تینی کمکاری نا کمک اٹ ہڑتوم آملک آتا الس ئِ خڑک اتنگ و ڈیہہ نا شونداری و شونہالی ناہدف آتا دوئی ئِ المی جوڑ کننگ مرے ۔
