اسلام آباد۔ 14اپریل (اے پی پی) پاکستان اٹی تعینات چین نا سفیر سن وی ڈونگ پارینے کہ چین نا سروک و الس جہانی شونداری نا خواہش مند ئُ۔ جمعہ نا دے داڑے چین نا صدر شی جن پنگ نا کتاب نا مون پاشی دود آن تران کرسا اوپارے کہ 2014ءٹی پاکستان و چین اواری اٹ چینی صدر نا کتاب نا انگریزی ایڈیشن اس شینک کریسر ہرانا اینو اردو ترجمہ شینک کننگ انگ ئِ۔ اوپارے کہ چینی صدر شی جن پنگ نا دورہ آن ہڑتوم آ ملک آتا تعلقداریک سوگو مسر و اوفتے پوسکن ئُ جہت اس رسینگا۔ اوپارے کہ چین نا طرز حکمرانی نا سرحال آ کتاب نا اردو ترجمہ آن پاکستان نا الس ئِ چین نا شونداری و شونہالی تون اوار چینی دودوربیدہ آن معلومداری ملک۔ اوصدر شی جن پنگ ئِ کمیونسٹ پارٹی آف چائنا نا بڑزکو راہشون گوندا و پارے کہ اونا کتاب چین و دنیا نا شونداری نا بابت اونا تغ تا عکاس ئِ۔ اوپارے کہ کتاب آن ہڑتوم آ ملک آتا الس ئِ پین خڑک اتنگ، پاک چین تعلقداری تا پین سوگوی ٹی کمک رسینگک وخت اس کہ سی پیک ناپوروی آن ڈیہہ نا شونداری نا تغ ئِ پورو کننگک۔ اوپارے کہ کتاب نا مون پاشی دود اٹی وزیرآک، پارلیمنٹ نا باسک آک، سفارتی نمائندہ، سول سوسائٹی و چندی زند انا بشخ آتیان تعلق تخوک آ بندغ آتا پبی کچ اسے ٹی شرکت پاک چین سنگتی نا عکاسی ئِ کیک۔
