کوئٹہ۔ 13اپریل (اے پی پی) صوبائی وزیر جان جوڑی میر رحمت صالح بلوچ پارینے کہ بلوچستان نا 27 ضلع غاتیٹی ٹی بی نا تشخیص نا بنجا اڈتننگانے ہراڑے داوخت اسکان 10 ہزار آن زیات مریض آتے رجسٹرڈ کننگانے وخت اس کہ صوبہ نا 21ضلع غاتیٹی ملیریا کنٹرول پروگرام نا پارٹنرز آتا کمک اٹ ملیریا نا درمان نا دوائی ، ملیریا نا ٹیسٹ اکن مائیکرو سکوپس ہم تننگانے۔ داہیت ئِ او پنچ شنبے نا دے تینا دفتر اٹی صحافی تتون ہیت وگپ کرسا پارے۔ میر رحمت صالح بلوچ پارے کہ بلوچستان نا 30 ضلع غاتیٹی ٹی بی نا پوسکن آ مریض آتا رپورٹنگ نا فریم ورک اس نافذ کرسا ایم آئی ایس، ڈاٹس، ٹی بی ڈی ایم آئی ایس سرویلنس درستی راستی کرفنگانے۔ ٹی بی نا تشخیص اکن 12ہسپتال آتیٹی فلور نسئینٹ مائیکرو اسکوپس تننگانے وخت اس کہ 27 ضلع غاتیٹی ٹی بی نا تشخیص نا بنجاءجوڑ کننگانے۔ اوپارے کہ مچ آ بلوچستان اٹی 10 ہزار ٹی بی نا مریض آتے رجسٹرڈ کننگانے و اوفتے ٹی بی نا درمان نا مفت دوائی تننگ انگ ئِ۔ اوپارے کہ 120 ڈاکٹر، 96 پیرامیڈیکل اسٹاف و 31 لیبارٹری اسسٹنٹ ئِ ٹی بی نا تشخیص و رپورٹنگ نا تربیت تننگانے الس اٹی ٹی بی نا بابت آن شعور آگاہی ودی کننگ کن 30 ضلع غاتا 90 راجی کارندہ غاتے سوشل موبلائزیشن نا تربیت تننگانے۔ اوپارے کہ صوبہ نا 21 ضلع غاتا مائیکرو اسکوپی (ملیریا نا تشخیص) کننگ نا 20 دے ئی تربیت جہانی ادارہ جان جوڑی نا ٹرینرزآتا کمک اٹ تربیت تننگانے گلوبل فنڈ انا کمک اٹ 21 ضلع غاتیٹی ملیریا کنٹرول پروگرام نا پارٹنر 63000 خلقت اسکان لیڈی ہیلتھ ورکرز آتا کمک اٹ ملیریا آن بچنگ و مچھردانی نا کاریم اٹ اتنگ نا بارواٹی معلومداری و آگاہی فراوانی آن پد ہندی آبادی ٹی مچھر دانی بشخ و پانٹ کرینے ۔ اسہ سوج اسے نا ورندی ٹی اوپارے کہ بلوچستان نا 21ضلع غاتیٹی ملیریا کنٹرول پروگرام نا پارٹنرآتا کمک اٹ ملیریا نا درمان نا دوائی ملیریا نا ٹیسٹ اکن مائیکرو اسکوپس ہم تننگانے۔
