اسلام آباد۔ 13اپریل (اے پی پی) وزارت داخلہ نا کنڈآن غٹ پاکستانی سفارت خانہ، وزارت خارجہ، سول ایویشن و امیگریشن کمامدارآتے پارت کننگانے کہ پاکستان ویزہ غاتا جاری و درملکی تا ملک اٹی ہن و بر و اڈکننگ نا تعلقدار کانود نا بے پرخ و امتیاز اطلاق ئِ المی جوڑ کننگے۔ پین وخت اس ناپورو کوائف نا فراوانی آ ویزہ غاتا جاری کننگ اٹی پورو پابندی تون اوار اوار دُن انگا غٹ درملکی تے پترینگ انگ و اسہ وڑناسرگرمی اس ہم اختیار کننگ نا موکل تفننگک۔ دا فیصلہ وزیر داخلہ چوہدری نثارعلی خان نا کماشی ٹی اینو وزارت داخلہ ٹی اڈ ہلوک آ بڑزکو کہولی دیوان اٹی ہلنگا۔ دیوان اٹی سیکرٹری داخلہ، ایڈووکیٹ ، جنرل ، چیئرمین نادرا، وزارت داخلہ، ایف آئی اے و ایلو سینئر افسر آک ساڑی ئسر۔ پاکستانی ویزہ معاملہ غاتیٹی شفافیت ئِ المی جوڑ کننگ نا غرض آن دیوان اٹی دا فیصلہ کننگاکہ پین وخت اس درملک آتیٹی واقع پاکستان نا غٹ سفارت خارجہ و ویزہ جاری کننگ نا مجاز کارندہ غاک داہیت انا پابند مریرہ کہ ویزہ نا دوئی کن درملکی درخواست گزار نا پورو معلومداری اتون اوار اوار ویزہ نا جاری کروک آ افسر آتا ہم ریکارڈ ئِ محفوظ و وزارت داخلہ ئِ دمدستی وڑاٹ گدریفنگک۔ شکار نا غرض اٹ پاکستان آ بروک آ درملکی مہمان تا ہن و بر نا چرجوئی ٹی حکومت پاکستان نا طے شدہ قواعد و ضوابط آ عملدرآمد کرفنگ اٹی ڈیوالائی و ایلو بے ضابطگی تا سخت نوٹس ئِ ہلساوزیرداخلہ پارت کرے کہ غٹ سفارت خانہ، ایویشن ، ایف آئی اے و امیگریشن کمامدارآک دا ہیت ئِ المی جوڑ کیر کہ سرگرمی اسے نا سوب آن پاکستان آ بروک آ غٹ ڈل و اوفتے تون اوار بروک آ اسٹاف ئِ پورو کوائف نا فراوانی آ ہی ویزہ جاری کننگے و کانودی جواز نا موجودگی اٹی ہی اوفتے ملک اٹی پترینگ انگ نا موکل تننگے۔ وزیر داخلہ پارت کرےت کہ اسہ ہم درملکی ڈل اسے نا پاکستان آ بننگ و ملک اٹی اڈکننگ اٹی سرجزآتا پورو سرجم آتے تعلقدار سفارت خانہ نا کنڈآن وزارت داخلہ ئِ کم از کم اسہ ہفتہ اس مست تننگے۔ اوپارے کہ داہیت ئِ المی جوڑ کننگے کہ ہراڑے پیشگی سیکورٹی کلیئرنس نا گرج مرے ہموڑے ویزہ جاری کننگ آن مست وزارت داخلہ آن سیکورٹی کلیئرنس دوئی کننگے۔ وزیر داخلہ سول ایویشن و ایف آئی اے کمامدار آتے ہم پارت کرے کہ دا ہیت ئِ المی جوڑ کننگے کہ شکار نا غرض آن بروک آ درملکی ڈل و مہمان آتون وابستہ پیشگی سرمروک آ غٹ اسٹاف نا ہن و بر بیرہ انٹرنیشنل ایئر پورٹس نا کمک اٹ ہی ممکن مرے و امیگریشن نا غٹ عمل ئِ بے پرخ و امتیاز پورو کننگے و اسٹ اسے ہم امیگریشن نا عمل ئِ پورو کننگ آن بیدس پترینگ نا موکل مفئے۔
