کلبھوشن یادیو نا پاکستان اٹی تخریبی سرجز آتا بابت ناقابل تردید شاہدی ساڑی ارے
اوغانستان امن کانفرنس (اینو) ماسکو ٹی مریک، پاکستان تون اوار 12ملک آک بشخ ہلیرہ
اسلام آباد۔ 13اپریل (اے پی پی)پاکستان پارینے کہ نیپال اٹی بے گواہ پاکستانی مسکوہی فوجی افسر نا معاملہ ٹی دشمن اودیم ایجنسی تا دوٹی خارج ازامکان اف۔ بھارت پاکستان اٹی تخریبی و دہشت گردی نا سرجزو دہشت گرد آتا مالی کمک اٹی اوار مسنے۔ بھارتی اودیم ادارہ رانا ایجنٹ کلبھوشن یادیو نا پاکستان اٹی تخریبی سرجزآتا بابت ناقابل تردید شاہدی ساڑی ارے۔ مقبوضہ کشمیر اٹی کوزہ گر بھارتی فوج انا ساڑی گری ٹی گچین کاری تے امنا کپنہ، کشمیر نا ویل کشمیری الس نا است خواہی و اقوام متحدہ نا کنڈآن آزادانہ منصفانہ استصواب رائے نا کمک اٹ ایسر کننگ مریک۔ داہیت آتے دفترخارجہ نا ترجمان محمد نفیس ذکریا پنچ شنبے نا دے ہفتہ وار پریس بریفنگ اٹی صحافی تا جتا سوج آتا ورندی ئِ ترسا پارے۔ کرنل(ر) حبیب ظاہر نا نیپال اٹی بے گواہ مننگ نا بابت اسہ سوج اسے نا ورندی ئِ ترسا ترجمان پارے کہ مسکوہی فوجی افسر ئِ ریٹائر مننگ آ چندی سال گدرینگانے۔ او روزگار نا چرجوئی ٹی نیپال آ ہناسس۔ اوپارے کہ مسکوہی فوجی افسر نا بے گواہ مننگ اٹی دشمن ایجنسی تا دوٹی خارج ازامکان اف انتئے کہ اونا ایلم ہم ایف آئی آر اٹی دشمن ایجنسی تے پندار کرینے۔ اوپارے کہ پاکستان مسکوہی فوجی افسر نا بازیابی کن نیپالی حکومت تون رابطہ کرینے۔ ترجمان بلوچستان اٹی دزگیر مروک آ بھارتی اودیم ادارہ رانا ایجنٹ کلبھوشن یادیو نا بابت اسہ سوج اسے نا ورندی ئِ ترسا پارے کہ کلبھوشن پاکستان اٹی تخریبی سرجزآتیٹی اوار خننگانے ، او کننگ نا وخت آ ہلنگاسس و اوتینا غٹ ڈوتے امنا ہم کرینے۔ کلبھوشن یادیو نا پیدواری آ پاکستان اٹی دہشت گرد نیٹ ورک ئِ چٹفنگانے۔ ترجمان پارے کہ ایڈیشنل سیکرٹری خارجہ نا سروکی ٹی پاکستانی ڈل اوغانستان نا بابت امن کانفرنس اٹی شرکت کیک۔ کانفرنس (اینو) جمعہ نا دے ماسکوٹی اڈ ہلنگ ئِ ہراٹی پاکستان تون اوار 12ملک آک بشخ ہلیرہ۔ ترجمان پارے کہ اقوام متحدہ ٹی پاکستان نا آخبتی مندوب ملیحہ لودھی ملالہ یوسف زئی نا اقوام متحدہ نا خصوصی ایلچی مقرر مننگ آ اونا اعزاز اٹی بیابخیری اس تس۔ ہنداوڑ کینیڈا نا دارالحکومت اوٹاوا ٹی پاکستانی ہائی کمشنر ہم ملالہ یوسف زئی نا اعزاز اٹی بیابخیری اس تسنے۔
