راولپنڈی۔ 13اپریل (اے پی پی) صدر مملکت ممنون حسین پارینے کہ ڈکھیا انسانیت نا خذمت کن میڈیکل پریکٹیشنرز نا کڑد بھاز اہمیت تخک ہرادے دا مقدس پیشہ ٹی بنداوی انسانی اقدار ئِ ہمیشہ بایدے سربلند تخوئی مرے۔ پنچ شنبے نا دے داڑے سرجن جنرل نا سالانہ اِرا دے ئی جہانی کانفرنس نا بنائی دود آن تران کرسا صدر ممنون حسین پارے کہ ڈاکٹرآک تینا پیشہ ٹی جوان وڑاٹ خذمت سرانجام ایترہرا طبی مہارت آن پوروی وڑاٹ لیس مریر و اوفتے انسانیت نا گچین خذمت نا معقول معاوضہ بایدے ملے۔ صدر پارے کہ دنیا ٹی چندی چیلنج آتا باوجود ڈاکٹر آتا بنداوی کڑد اٹی ہچ ئُ بدلی اس بتنے ولے ساڑی آ سال تیٹی معاشی وٹیکنالوجی بشخ آتیٹی ترند رفتار شونداری ٹی رجحان و رویہ غاتیٹی بدلی بسنے ہراڑآن ڈاکٹر و مریض آتا تعلقداری تیا زئم تمانے۔ اوپارے کہ ٹیکنالوجی بشخ انا شونداری نا سوب میڈیکل نا تعلیم داسہ پیچیدہ و مہنگی مسنے و ڈاکٹر آتے تعلیمی عمل و داکان پد روزگار نا دوئی ٹی بھاز ویل آتا مون تروکی مریک۔ صدر مملکت معاملہ غاتا ایسری آ زورشاغا تانکہ ڈاکٹر خواجہ غاک تینا کسبی زند اٹی ہچ ئُ بے است جمی اس محسوس کپس۔ اوپارے کہ نزور سروس اسٹرکچر و انتظامی وڑنا معاملہ غاک ڈاکٹر تا ویل آتا زموار ئُ۔ صدر پارے کہ دُن انگا حالیت آتیٹی خاص کر ورناڈاکٹر آتون بیرہ اِرا آپشن سلک کہ یاتو او بزنس اپروچ اختیار کیر ہراڑآن مریض آتے کن ویل ودی مریک یا تو تینا بزرگ آتا سنہری اقدار ئِ سربلند کیر۔ صدر پارے کہ اگہ ڈاکٹر آتا مالی مشکل آک ایسر متوس تو حالیت آتیان ویل و غاوک ودی مریرہ۔ داکان مست سرجن آف پاکستان لیفٹیننٹ جنرل آصف ممتاز سکھیرا تینا بیابخیری تران اٹی پارے کہ آرمی میڈیکل کور نئے بیرہ زمانہ امن اٹی طبی خذمت آتے کن تینا کڑ دئِ ادا کننگ ئِ بلکن ملک انا مر مر انگا علاقہ غاتیٹی ہم صف اول نا محافظ واک انا وڑاٹ کاریم کننگ ئِ۔ اوپارے کہ آرمی میڈیکل کور سانحہ غاتیٹی پاکستان آن پیشن ہم خذمت سرانجام ایتک۔ داچرجوئی ٹی نیپال اٹی زمی جمب اٹی بھاز خذمت سرانجام تس۔ اوپارے کہ میڈیکل نا تعلیم و تربیتی ادارہ غاتا دنگ ئِ ودفنگانے و اومیت ئِ کہ جہانی سرجن جنرل کانفرنس میڈیکل سائنسز نا بشخ اٹی آزموندہ غاتا ہِننگ و بننگ نا موقع فراوان کیک۔ سرجن جنرل لیفٹیننٹ آصف ممتاز سکھیرا صدر مملکت ممنون حسین ئِ کانفرنس نا اسہ یات گار نشان ہم اس پیش کرے ۔ داوخت آ آرمی میڈیکل کور نا کڑد انا بابت اسہ دستاویزی فلم اس ہم پیش کننگا۔
