پاکستان غٹ ہمسایہ ملک آتون گچین تعلقداری خواہک
اسلام آباد۔ 12اپریل (اے پی پی) بنجائی وزیر ریاستیں و سیمی امور لیفٹیننٹ جنرل (ر) عبدالقادر بلوچ پارینے کہ پاکستان بھارت تون اوار غٹ ہمسایہ ملک آتون گچین تعلقداری خواہک ، وزارت داخلہ و نادرابلاک شناختی کارڈ نا بابت اوغان کمشنر یٹ نا ریکارڈ ئِ ہرے تو پال انا پال و دیر انا دیر مریک۔ چارشنبے نا دے پارلیمنٹ ہاﺅس نا پیشن میڈیا تون ہیت وگپ کرسا اوپارے کہ بلاک شناختی کارڈ نا بابت وزارت داخلہ و نادرا کمامدارآک اوغان کمشنریٹ نا ریکارڈ ئِ ہریر تو غٹ ویل ایسر مریک۔ اوپارے کہ اوغان کمشنریٹ تون 1978 ءآن ہلیس داوخت اسکان غٹ ریکارڈ ارے اوڑآن کمک ہلنگ مریک ، برانز کروک آتا روا ویل آتے ایسر کننگ انگ ئِ ، ولے ہمو خلقت ئِ شناختی کارڈ جاری کننگپک ہرا درملکی ئُ۔بنجائی وزیر پارے کہ پاکستان بھارت تون غٹ ملک آتون گچین تعلقداری تا خواہش مند ئِ ولے کلبھوشن یادیو بھارتی ایجنٹ اسے او نئے بیرہ ملکی سلامتی نا برخلاف کاریم کرے بلکن ملک اٹی دہشت گردی کرفنگ نا ہم اعتراف ئِ کرینے اودے کانود نا رداٹ سزا تننگک۔ اوپارے کہ کلبھوشن نا سزا نا معاملہ کابینہ ٹی شرہ ٹی اتنگ تنے ، عدالتی فیصلہ ئِ کابینہ ٹی شرہ ٹی اتنگ مفک۔ اسہ سوج اسے نا ورندی ٹی اونیپال اٹی بے گواہ مروک آ پاکستان نا کرنل حبیب نا بے گواہ مننگ نا بابت پارے کہ کنے دا بابت سمااف۔
