اسلام آباد۔ 12اپریل (اے پی پی) صدر مملکت ممنون حسین بلوچستان آن تعلق تخوک آ ایل ایل بی و ایل ایل ایم نا طالب علم آتے خصوصی اسکالر شپ تننگ نا پڑو کرسا پارینے کہ ایچ ای سی نا کنڈآن ہر سال بیست طالب علم ئِ وظیفہ تننگک داکان بیدس بڑزکو کارکڑد نشان تروک آ طالب علم آتے پیشن نا ملک آ پی ایچ ڈی کن وظیفہ ہم تننگک۔ صدر مملکت داہیت ئِ ایوان صدر اٹی ینگ لائرز بلوچستان نا ڈل اتون اوڑدہی ٹی پارے ہرافک احمربلال صوفی نا سروکی ٹی اوڑتون اوڑدہی کریر۔ صدر مملکت پارے کہ بلوچستان ئِ شون ترسا ملک انا ایلو بشخ آتا بریبر اتنگ ننا غٹ انا زمواری ئِ۔ گوادر پورٹ و ایلو ڈٹ آتیٹی بلوچستان نا خلقت ئِ زیات آن زیات ملازمت تننگک۔ گوادر اٹی دیر انا گرج آتے پورو کننگ کن ڈٹ آتیا کاریم برجائِ۔ بلوچستان نا ورناتے چینی زبان ہیل تننگ کن ”نمل“ زوت گوادر اٹی کیمپ اس قائم کیک۔ اوپارے کہ دامسخت کن نمل نا کیمپ آتا اڈتننگ کن ایوان صدر بھلو زراس فراوان کرینے۔ صدر مملکت پارے کہ بلوچستان نا آخبت روشنائِ، داصوبہ بھاز شون ہلیک۔ صدر مملکت پارے کہ اقتصادی راہداری بلوچستان نا بنداوی بشخ ئِ دانا غٹ آن زیات فائدہ ہم بلوچستان ئِ مریک و ملازمت آتیٹی ہندی بندغ آتے اولیت تننگک۔ اوپارے کہ بلوچستان نا شونداری کن ورناک قائدانہ کڑد ادا کیر۔ صدر مملکت سینئر وکیل آتا شہیدی آ اوفتے خراج تحسین پیش کرسا پارے کہ اوفتا شہیدی آن ودی مروک آ خلاورناوکیل آک تینا جوش و جوزہ اٹ پُر کیر۔ صدر مملکت پارے کہ بلوچستان نا ورناک تعلیمی بشخ اٹی گچین کارکڑد نشان تننگ ئُ۔ صدر مملکت پارے کہ بدعنوانی نا سوب آن بلوچستان تون اوار مچ آ ملک ئِ نسخان رسینگا ولے داسہ کل قوم دا لعنت آن خلاصی کن بش مسنو۔ اوداہیت آ است جمی نا درشانی ئِ کرے کہ ملک اٹی بدعنوانی نا کسر ئِ بند کننگا، داکان پد داسہ ہرکس کہ مرے قومی شونداری نا کسر ئِ توننگ مفک۔ صدر مملکت پارے کہ ملک ئِ نسخان رسیفوک آ ہربندغ دوٹی بریک۔ اوپارے کہ قوم انا ہر بندغ تینا قومی زمواری ئِ پورو کے تو ملک انا غٹ ویل آک ایسر مریرہ۔ اوپارے کہ گچین اخلاقی اقدار ئِ پورو خواری اٹ دُوارہ رائج کننگ نا گرج ئِ۔ داوخت آ صدر مملکت ہیت وگپ کرسا پارے کہ وکلا برادری عدل و انصاف نا اہم ئُ جزوئُ۔ وکلابرادری لس بندغ ئِ ہڑزان و زوت انصاف رسیفنگ کن تینا کڑدئِ ادا کیر ۔ صدر مملکت وکیل و کانودی برادری نا بلوچستان اٹی امن قائم کننگ کن اوفتا کڑدانا ستائِ کرے۔ صدر مملکت احمر بلال صوفی و ریسرچ سوسائٹی آف انٹرنیشنل لائ(آرایس آئی ایل) نا کنڈآن بلوچستان آن تعلق تخوک آ ورناوکیل آتا تربیت کن کروک آ گام گیج آتا ستائِ کرے و اومیت نا درشانی ئِ کرے کہ ورناوکلاءبرادری داڑآن زیات آن زیات فائدہ ہرفنگ کیرہ۔ احمر بلال صوفی دا وخت آ صدر مملکتئِ فیلو شپ پروگرام نا بابت بریفنگ ترسا پارے کہ بلوچستان آن داوار سی ورناوکلاءایلو فیلوشپ پروگرام اٹی اوار مسنو ہرافتے ٹی 10 زالبول و 20 نرینہ ئُ ہرافتا تعلق بلوچستان نا مر مر انگا علاقہ غاتیان ئِ۔
